Guwahati, Nailar:
Ki pulit jong ka Hailakandi ki la ïoh ban kurup ïa 300 tylli ki borni kiba don ka jingkhia kumba 15 tonnes u Burmese Supari na Pachinkitabond Part 1 ka shnong kaba don ha Hailakandi ha Assam.
Ïa une u Supari la ïoh ban kurup na ka ïingsah jong uwei uba la shah kynnoh nongkhaïi tuh u Rosan Uddin Mazarbhuiya. Ki pulit ki la ïathuh ba ki la ïoh jingtip shaphang ka jingbuh beaiñ ïa u Supari ha kawei ka ïing. Ka kynhun jong ki pulit ka la pynlong ïa ka jingleit khynra ha katei ka ïing bad ïoh ban kurup ïa u Supari.
U Rosan Uddin Mazarbhuiya hadien ka jingshahkem u la shah tohkit bniah ha ki pulit ha kaba ïadei bad ka jingdonkti jong u ban khaïi ïa une u mar da ka jingïatreilang bad ki nongpynmih ïa une u kwai.
Ïa u Supari jong ki nong Burma la khang pyrshah ha India namar ba u dei u jingbam uba long ka daw tynrai halor ka jingwanrah ïa ka jingpang bampong, kaba long ka jingpang bampong kaba ju ïoh na ka shyntur.
