Agartala, Nailar:
U Myntri Rangbah jong ka Tripura u Manik Saha u la kynnoh ïa ka liang pyrshah ka Tipra Motha ba ka la ïalam bakla ïa ki riewlum da kaba phah dawa phiah jylla na ka bynta jong ki.
U Saha u la ong ba ka sorkar ba la lamkhmat da ka seng BJP kan sa pynlut da kumba T. 5000 klur na ka bynta ban ai jingïarap sha ki riewlum bad ym T. 600 klur kumba la pynshisha da ka Tipra Motha.
U la ong ba ka jingdawa ban phiah jylla ka dei ka jingthmu ban phiah ïa ki briew bad kane kan ym kyntiew ïa ka jylla khlem ki riewlum. Ka Tipra Motha ka la dawa ban phiah jylla na ka bynta ki riewlum ha kaba kane ka la paw naduh kine ki khyndiat snem ba la leit.
Ha kaba ïadei bad kane, na ka liang ka seng BJP ha kawei ka liang ka la pyrshah halor kane ka jingdawa na ka bynta ban phiah jylla. Ki nongïalam jong ka, ki la kynnoh ba ka Tipra Motha ka la wanrah ïa kane ka mat tang kumno ba kan ïohnong ha kaba ïadei bad ki kam saiñ pyrthei.
