Beijing, Nailar:
Hadien khyndiat sngi jong ka jingpynrem ka China halor ka jingleit jong u Vice President ka Taiwan sha United States, u Myntri ka tnat iada jong ka China- u Li Shangfu ha ka Sngi Ba-ar pat u la maham ia ka Taiwan bad ka United States da kaba ong ba kim bit ban lehkai bad ka ding.
Ha katei ka sngi, u Li Shangfu u la ong ba watla ka United States ka pyrshang ban ai jingkyrshan ia ka Taiwan ha ki liang bapher, hynrei baroh ki jingpyrshang jong ka US kin long kiba sep-ei hakhmat ka China. Kumta u la kyntu ia ka US ba kan ym iadon bynta eiei bad ki kam ki jam jong ka Taiwan nangne sha khmat.
Shuh shuh ruh ha katei ka jingmaham na ka liang ka China, u Li Shangfu u la ong ba ka China ka lah ban pyniasoh biang noh ia katei ka ri dew lynnong ‘Taiwan’ sha lade ha kano- kano ka por.
Hynrei u Li u la ong ruh pat ba kiwei ki bor ba nabar kim lah ban buh jingkylli ia ka China haba iadei bad ka Taiwan, namar ka China ka lah ban pyniasoh sha lade ia ka Taiwan ha kano- kano ruh ka por katkum ka jingsngew donkam bad jingsngew bit jongka.
Kumta, ka China ka la maham bad ong ba lada ka Taiwan ka long shngaiñ, ka pyrthei baroh kawei kan shong shngaiñ. Hynrei lada don ba pynthud ia ka jinglong- jingman ha Taiwan, ka pyrthei baroh kawei ruh kan khih win.
