Shillong, Nailar 20
Ka Sports Department jong ka skulbah North-Eastern Hill University, Shillong kan pynlong ïa ka lympung kaba la tip kum ka NEHU Inter College Football (Men) Tournament ka ban sdang naduh ka 21 tarik haduh ka 31 tarik mynta u bnai ha SAI Football Ground, NEHU Permanent Campus, Shillong.
Ha kane ka lympung kin don haduh 32 tylli ki kolej na kylleng ki jaka bad kynthup haduh kumba 700 ngut ki nongïalehkai ki ban ïashim bynta ba kynthup ruh ïa ki coach bad manager.
Ki jingïalehkai ki ban long ha ka 21 tarik mynta u bnai, kata ka jingïalehkai ba nyngkong kan long hapdeng ka St. Dominic College, Shillong pyrshah ïa ka Ri-Bhoi College, Nongpoh.
Ki jingïalehkai ban bud ha kane ka sngi kin long hapdeng ka KL Bajoria College pyrshah ïa ka Morningstar College, Shillong, ka NEHU Tura Campus, Tura kan ïakhun pyrshah ïa ka Sohra Govt. College, Sohra bad ka jingïalehkai ba khatduh kan long hapdeng ka St. Anthony’s College, Shillong pyrshah ïa ka Don Bosco College, Tura.
