Beijing, Nailar:
Ka China ha ka Sngi Saitjaiñ, ka la leit ban pyn kilan biang ia ki shipai jong ka ha kylleng sawdong jong ka Taiwan wat hapdeng shibun ki jingmaham na ka United States ba ka China kam dei ban leh don bor ne pynthut ia katei ka ri dewlynnong ‘Taiwan’. Katei ka jingleh jong ka China ka long kum shi bynta ban pynpaw ia ka jingbitar halor ka jingleit jurip jong u Vice President ka Taiwan sha United States ha kine ki khyndiat por ba la leit.
U Lai, u la wan jurip sha New York bad u la wan phai pat lyngba ka San Francisco ha ka jingiaid lynti jong u sha Paraguay, ha kaba kitei ki long ki ri kiba ju ai jingkyrshan bad iatrei lang bad ka Taiwan na ka por sha ka por.
Kumta, ka China ha katei ka Sngi Saitjaiñ, ka la khot kyrteng ia u Lai da ‘u nong wanrah jingeh’ bad ka la byrngem tyngeh ruh ba kan leh eiei halor ka jingleh pyrshah jong utei u nongialam ka Taiwan khlem da pynsngap ia ki jingmaham jong ka China naduh shwa ka jingleit jurip jong u sha US.
Ha katei ka sngi, la ong ba ka Eastern Theatre Command jong ka Chinese People’s Liberation Army, ka la leit ban pynkilan bad pyniaid tawiar ia ki liengsuiñ jongka baroh kylleng sawdong jong ka Taiwan bad ban pyni ruh ia ka jinglong trai jongka haba iadei bad katei ka ri dew lynnong, kumba ka China ka la ju pynshai na ka por sha ka por ba ka Taiwan ka long hi ka bynta kaba shu pait na ka China bad ba ka lah ruh ban pyniasoh biang ia katei ka bynta ba la pait sha lade ha kano- kano ka por katba ka sngew donkam ne sngew bit.
Ha kajuh ka por ruh ka China ka ju byrngem bad maham ia ki bor ba nabar, khamtam ia ka United States, ba kim bit ban leit iadon bynta ha ki kam- ki jam jong katei ka ri dew lynnong namar ka China ka don ryngkat bad ka Taiwan bad ka lah ban bishar bad ban pynbit- pynbiang hi dalade ia ki jingdonkam hapoh jong katei ka ri.
