Khliehriat, Nailar 20
Ka Ïatyllilang Hingaria Sports Club ka la ïoh ban buh jaka ïalade sha ka jingïakhun quarter-final jong ka lympung ïalehkai 2nd Division Football Tournament kaba la pynïaid da ka East Jaiñtia Hills District Football Association (EJHDFA).
Kane ka la wan hadien ba ka Ïatyllilang Hingaria ka la lah ban pynliem noh ïa ka Dkhiah West Sports Club da 1-0 kol ha ka jingïakhun pre quarter-final kaba la long ha madan Artificial Turf, Diengshynrum ha East Jaintia Hills District ha ka sngi Saitjaiñ.
Ka jingïakhun hapdeng kitei ki ar tylli ki kynhun ka la long kaba itynnad bad kaba ïakhaid bha, kaba la pynshongshit ïa ki nongwan peitkai hynrei ha kaba kut ka shi kol kaba la ïoh ban thep da u Zidane Lamin ka la pynlong ïa ka Ïatyllilang Hingaria ban khur ka jingjop bad jam sha kawei pat ka kyrdan.
Haba phai pat sha ka jingïakhun kaba bud jong kane ka sngi kaba la long hapdeng ka Jalyiah United Sports Club pyrshah ïa ka Tuberkmaishnong SSC ka la kut noh ha ka jingïakhaid da mar shi kol.
Ïa ka kol jong ka Jalyiah United la ïoh ban thep da u Tanlang Dkhar ha ka minit kaba 34 katba ïa ka kol jong ka Tuberkmaishnong la thep da u Tony AR Phawa ha ka minit kaba 09.
Ha ka jingïakhun kaba khatduh pat jong kane ka sngi, ka Kairang Sports Club ka la lah ban pynliem noh ïa ka Tongseng Youth SSC da 2-1 kol ha ka jingïalehkai kaba itynnad bad ïakhaid bha.
Ïa ki kol jong ka Kairang SC la ïoh ban thep da u Sngewlang Rymbai ha ka minit kaba 40+2 bad u Rimon Nongtdu ha ka minit kaba 72 katba ïa ka shi kol jong ka Tongseng Youth la thep da u Daoshwa Amse ha ka minit kaba 78.
