Jowai, Nailar 20
Ka Mukhla Umlangchor Sports Club, Moodop Royal Sports Club bad Madankynsaw Mookyndeng Sports Club ki la rung sha ka jingïakhun semi-final jong ka lympung ïalehkai 3rd Division Football Tournament-3rd Adelbert Memorial Trophy kaba la pynïaid da ka West Jaiñtia District Sports Association (WJDSA).
Kane ka la wan hadien ba kitei ki kynhun ki la khur jingjop ha ka jingïakhun quarter-final kaba khatduh kaba la long ha madan Kiang Nangbah Stadium Ladthadlaboh ha ka sngi Saitjaiñ.
Haba phai sha ka jingïakhun quarter final kaba nyngkong, ka Mukhla Umlangchor ka la lah ban pynliem noh ïa ka Newhill Sports Club da 1-0 kol bad ïa kane ka kol jong ka Mukhla Umlangchor la thep da u Rynkat Sumer ha ka minit kaba 84.
Ha ka jingïakhun quarter final kaba bud pat, ka Moodop Royal ka la lah ban pynliem noh ïa ka Pateinki Sabah da 2-0 kol. Ïa kine ki kol jong ka Moodop Royal la ïoh ban thep da u Harvestar Dhar ha ka minit kaba 53 bad u Lakhon Shylla (own goal) ha ka minit kaba 75.
Ha ka jingïakhun quarter final kaba khatduh jong kane ka lympung ïalehkai, ka Madankynsaw Mookyndeng ka la lah ban pynliem noh ïa ka Da-i-hi Mynsngat da 1-0 kol. Ïa kane ka kol jong ka Madankynsaw Mookyndeng la ïoh ban thep da u Danechan I Sayoo ha ka minit kaba 63.
Ka jingïakhun semi final jong katei ka lympung kan long ha ka 21 tarik hapdeng ka Madan Thadmuthlong pyrshah ïa ka Mukhla Umlangchor ha ka por 1.00 baje nohphai sngi. Ka Moodop Royal kan ïakhun pyrshah ïa ka Madankynsaw Mookyndeng ha ka por 3.00 baje janmiet.
