London, Nailar:
Kane ka nos kaba la tip kyrteng kum ka Lucy Letby, ha ka Sngi Thohdieng ka la shah pynngat kyndon noh hadien ba la lap ia ka jingdon kti jongka ban pyniap ia 7 ngut ki khyllung, katba ka dang thmu ban pyniap sa ia 6 ngut kiwei pat ki khyllung kiba dei peit hapoh ka kti jong ka. La ong ba kane ka long kawei na ki jingjia pyniap briew ba shyrkhei tam ba ka United Kingdom (Britain) ka la ioh mad ha kane ka por. I khyllung ba dang rit tam eh napdeng baroh kiba katei ka nos ka la pyniap i dei i khyllung ba dang shi sngi.
Katba ia ka daw jong katei ka kam pyniap briew jongka, ym shym la tip shai bad ki bor ka aiñ ki dang bat noh ia katei ka nos ban ioh tohkit bniah halor ki daw jong ka jingpyniap jongka ia kitei ki khyllung.
Ki 2 ngut ki khyllung kiba ka Lucy ka ioh ban pyniap hashwa ban lap noh, ki long ki khun synrap ba la kha haduh 3 ngut shisien kha.
Ka Lucy ka la shah kem bad lait noh la 2 sien kynthih bad ka sien ba lai ba la kem biang ia ka ka dei ha u snem 2020. Dei naduh katei ka por ba ka la shah bat bad shah pynngat hapoh ka kti jingtohkit jong ki kynhun tohkit halor ka jingleh ia ki kam beaiñ bad ka jingdonkti ban pyniap briew ha kitei snem ba la leit.
Ki briew jong ka kynhun tohkit, ki iathuh ruh ba ka Lucy ka don jing-iadei bad uwei u doktor na ka hospital hapoh Countess jong ka Chester.
U long ruh uwei na ki doktor uba ju ioh jingtip thik-pa-thik haba don ki khyllung kiba kem pang ne shitom ha katei ka hospital, bad kumta ka kynhun tohkit ka la suba ioh katei ka jingleh jong ka Lucy ka long ba utei u doktor un pynleit jingmut bad pyrkhat naka bynta jong ka, hynrei ka Lucy ka la kyntait ia katei ka jingmut jong ki.
Katkum ki message ba la shem da ka kynhun tohkit lyngba ka mobile phone jong katei ka nos, la shem ba katei ka nos ka ju don jingiadei bad utei u doktor bad ki ju leit ban iakynduh markhmat ruh ha ki por ba la dep kam watla ka Lucy ka la shah weng na ka tnat ‘Neonatal Unit’ ha u Naitung jong u snem 2016.
