Shillong, Nailar 21
Ka lympung ïakop ïasiat kaba la tip kum ka 10th North East Shooting Championship 2023 (Rifle/Pistol) ïa kaba la pynlong da ka Shooting Association of Meghalaya (SAM) ha ryngkat ka jingïatreilang bad ka Directorate of Sports and Youth Affairs ka Sorkar Jylla ka la sdang ha ka Lah Sngi U Blei ha Indoor & Outdoor Shooting Ranges jong ka Assam Regimental Centre kaba don ha Happy Valley, Shillong.
Ha kane ka jingïakop la wan ban ïashim bynta da 227 ngut ki nongïasiat ba paw na ki hynriew tylli ki jylla jong ka thaiñ Shatei Lam-Mihngi bad kumjuh ruh na ka Services, lait noh tang na ka jylla Tripura bad Sikkim.
Ïa kine ki nongïasiat ba paw, la phiah ha ki kyrdan kiba pher bapher, kata ha ka Small Bore Rifle & Pistol, ha ka jingïakop ka ban ïaid haduh hynñiew sngi.
Ïa kane ka lympung yn peit bad pynïaid bad bishar da ki 10 ngut ki dkhot jong ka Jury and Technical Officer na ka NRAI, ba kan long katkum ki kyndon ba la buh da ka National Rifle Association of India.
