Shillong, Nailar 21
Ka lympung ïalehkai phutbol jong ki kolej kaba la tip kum ka NEHU Inter College Football (Men) Tournament 2023 ka la sdang bad la plie pyrda ïa ka ha ka sngi Nyngkong ka 21 tarik u Nailar, 2023 ha madan jong ka SAI Football Ground, NEHU Permanent Campus, Shillong.
Ïa kane ka lympung la wan ban plie pyrda da u Prof. L. Kma kum u Kongsan ha ka jingïadon lang ryngkat u N. Das, Assistant Director (PE & Sports), NEHU cum Organising Secretary jong katei ka lympung bad kiwei kiwei ki kynrem ki lyndan.
Haba phai sha ki jingïalehkai ha kane ka sngi sdang, ka Ri-Bhoi College, Nongpoh ka la lah ban pynliem noh ïa ka St. Dominic College, Shillong da 3-2 kol, ha ka jingïalehkai kaba itynnad bad ïabiang bor bha baroh ar liang.
Ha kawei pat ka jingïalehkai, ka Sohra Govt. College, Sohra ka la lah ban pynliem noh ïa ka NEHU Tura Campus, Tura da 3-0 kol.
Ka Morningstar College, Shillong ka la lah ban pynliem noh ïa ka K. L. Bajoria College da 4-3 kol, ka jingïalehkai kaba la pynshongshit bad kaba itynnad.
Ha ka jingïalehkai bakhatduh pat jong kane ka sngi, ka St. Anthony’s College, Shillong ka la khur ïa ka jingjop kaba heh, ha kaba ka la lah ban pynliem kput noh ïa ka Don Bosco College, Tura da haduh 8-0 kol, ka jingïalehkai kaba la lah shiliang.
