Shillong, Nailar 21
U General Secretary jong ka Meghalaya State Olympic Association (MSOA) Bah Finely L Pariat u la ong ba haduh kane ka khyllipmat kaba mynta, ba ka MSOA kam ithuh ïano ïano ruh ki synjuk ïalehkai Karate ba la mih ha ka jylla lait noh tang ïa ka All Meghalaya Karate Do Association (AMKA).
U Bah Finely u la pynpaw ïa kane haba ïakren bad ki lad pathai khubor ha ka sngi Saitjaiñ jong ka taïew ba la dep, hadien ba u la don bynta ban sakhi lang ïa ka jingpynhap pyrda ïa ka lympung ïalehkai jong ka 29th Inter School and 11th Inter College Karate Tournament 2023, kaba la long ha ki lai sngi jong ka taiew kaba la dep, ha Multi-Purpose Indoor Stadium jong ka SAI, STC, NEHU.
U Bah Finely u la pynïeng ïa ka daw ba balei ma u, u ithuh tang ïa ka AMKA, ka daw hi ka long ba ka dei ka synjuk ïalehkai kaba la rim tam ha ka jylla kaba la seng naduh ka por ka jong u Sensei Stephan Leong (bam kwai ha dwar U Blei) kaba haduh mynta mynne, ka rukom pynïaid ka jong ka, ïa manla ki lympung ïalehkai ka long kaba biang bha.
Nalor kata, u Bah Finely u la pynpaw ruh ba ka MSOA ka la shim ïa ka rai ba kan lum ïa ka jingïalang ka executive committee, ban leh eiei khamtam ïa ki dkhot, namar u sngew ban ong ba ka jinglong dkhot ka dei na ka bynta ban kyntiew ïa ka kam ïalehkai bad katno tam lei lei haba ka AMKA ka dei ka synjuk kaba dang im, kumta kam don nongrim ban pynpait, bad dei ha kane ka jingïalang la sngewthuh ba ka MSOA kan sa shim ïa ki sien jam ba lada uno uno u dkhot uba thmu ban pynpait ïa ki synjuk ïalehkai ha ka jylla, yn sa shim ïa ki lad ki lynti ban pynshitom da kaba tyngeh.
Nalor katta, u Bah Finely u la kam ruh ba tat haduh mynta mynne, ka Indian Olympic Association ka ithuh tang ïa ka Synjuk ïalehkai karate kaba la pynïasnoh da ka AMKA bad nalor kata u la ong ruh ba ka MSOA ka peit ïa ki Synjuk kiba im ne wat ïa kito kiba la jah noh ruh, ka ïaleh ba kan pynkhie im biang ïa ki, kumta khlem da kynthoh ne ban kynnoh ïano ïano, u Bah Finely u pynpaw ba ka MSOA kan ïeng skhem beit halor ka nongrim ba kan ithuh beit tang ïa ka AMKA.
