Jowai, Nailar 21
Ka Mukhla Umlangchor Sports Club bad ka Madankynsaw Mookyndeng Sports Club mynta kin pynkhreh ban ïaknieh ïoh rah ïa ka nam lahduh jong ka lympung ïalehkai 3rd Division Football Tournament-3rd Adelbert Memorial Trophy ïa kaba la pynïaid da ka West Jaiñtia District Sports Association (WJDSA).
Kane ka la wan hadien ba kitei ar tylli ki kynhun ki la ïoh rung sha ka final jong katei ka lympung hadien ba khur nam jop ha ka jingïakhun semi-final kaba la long ha madan Kiang Nangbah Stadium Ladthadlaboh, Jowai ha ka Lah Sngi U Blei jong ka taïew.
Haba phai sha ka jingïakhun semi-final final kaba nyngkong, ka Mukhla Umlangchor ka la lah ban pynliem noh ïa ka Madan Thadmuthlong Sports Club da 1-0 kol. Ïa kane ka kol jong ka Mukhla Umlangchor la ïoh ban thep da u Ovenson Symblai ha ka minit kaba 57.
Ha kawei pat ka jingïakhun semi-final kaba bud, ka Madankynsaw Mookyndeng ka la lah ban pynliem noh ïa ka Moodop Royal Sports Club da 1-0 kol bad ïa kane ka kol jong ka Madankynsaw Mookyndeng la ïoh ban thep da u Cornilius Suchiang ha ka minit kaba 34.
Na ka liang jong ka WJDSA ka la pynbeit ba ka jingïakhun final hapdeng ka Mukhla Umlangchor pyrshah ïa ka Madankynsaw Mookyndeng kan long ha ka 29 tarik mynta u bnai.
La khmih lynti ba ka jingïakhun hapdeng kine ki ar tylli ki kynhun kan long kaba itynnad bad kaba ïakhaid bha naba baroh ar liang ki long ki kynhun kiba biang bor bad kiba tbit, kumta la wer ïa ki nongkyrshan bad ki riew ieit phutbol ba kin hiar sha madan ha kane ka sngi, ban nang pynshonshit shuh shuh ïa kane ka final.
