Nongsaiñ Hima, 1965
Ka long kaei kaei kaba sngewtynnad shibun ban iohi ba ki samla ka sor Shillong ki la pynpaw ba ki long kiba kloi ban ïashim bynta ha ki jingïalehkai. Ka Inter Girls High School Sports kaba hynñiew kaba la long mynha kane ka taiew ba la dep ka pyni ba ki samla ka sor ki lah ban nang kiew shaphrang ha ka liang ki jingïalehkai lada kin ioh ia ki jinghikai bad jingpynshlur kaba biang. Lah ban ong ba tang ka jingminot ïa ki kot pule kam ïarap satia ïa ki samla shong skul ba kin kiew shaphrang, bad dei na kane ka daw ba ïa ki jingïalehkai la dei ban nang pynshlur shuh shuh ha man la ki skul ruh. Lah ban ong ruh ba ka jaka ka dang bun ban pynkiew shuh shuh ia ka kyrdan ïalehkai.
Ym dei tang ka kyrdan ba ki samla ïalehkai ki dei ban nang ïaleh ban nang kiew, hynrei ka long kaba donkam ruh ba kin don ka mynsiem kylluid kaba dei ban don ha baroh ki rukom jingïalehkai. Kam da pher eh mano ba jop ne mano ba rem, hynrei ka pher eh mano ba jop ne mano ba rem, hynrei ka pher shibun lada ïa ka jingialehkai la ïaleh ha ka rukom kaba khim mynsiem, ka mynsiem kaba isih ne bishni ïa kiwei kiwei ki para nongïalehkai, ka mynsiem kaba domriang ne kaba wad ban pynhiar kput ïa kiwei kiwei pat ki team. Lada ki nongïalehkai ki don kum kane ka mynsiem ha ka por ba ki ïaleh ïa kano kano ka jingialehkai, kan nym lah satia ban ïarap ïa kine ïa ka jingïalehkai baroh kawei. La ju iohi bunsien ba kum kane ka mynsiem ka pynmih ïa kiei kiei ki jingjia kiba sngewsih kum ki jingprotest ne jingsuspend, ne haduh ki jingïashoh ïadat kiba la long ym tang kiba pynsah sniew ïa u ne ka nongïalehkai kiba don kum kane ka mynsiem, hynrei ka pynthut bad pynsniew lut ïa baroh kawei ka jingïalehkai bad kumta ka jing-itynnad bad jingkordor jong kano kano ka jingïalehkai ka thut bad sniew dur noh.
Ki nongïalehkai kiba la kham san ne kham nang ki ju dei barabor ban pyni ïa ka mynsiem kaba kylluid kaba ïaishah, khnang ba kiba dang khie dang san ki lah ban bud ïa kum kane ka nuksa kaba bha. Namar lada ki nongïalehkai ha kano kano ka jingïalehkai la ki long ki kynthei ne shynrang, ki don ka mynsiem kaba phuh samrkhie lada jop ne lada rem ka pyni ba kum kita ki nongïalehkai ki lah ban nang kham kiew shaphrang, ban nang kham tbit shuh shuh wat haduh ba kin long ki khlur jong ka madan ialehkai.
Kumta ym dei tang ban sngew sarong ba ngi la long kiba tbit ne kiba lahduh ha ka jingïamareh, ha ka Basket Ball, ha ka Football ne ha ka Hockey, hynrei lada ngi la don kum ha kata ka kyrdan ngi dei ban ïaleh shuh shuh ban nang pyntbit shuh shuh ïalade bad kaba kongsan ka long ban don ka mynsiem ïalehkai kumba la kdew haneng kaba ki ong ka ‘sports man spirit.’ Kumta la sngewdei ban ong ba ïa kane ka mynsiem ïalehkai la dei ban pyni bad hikai khamtam ha kito kiba dang khie dang san, namar kum kane ka mynsiem ka donkam ruh ha ka jingim.
