Guwahati, Nailar:
Ki la don kumba lai tylli ki distrik ha Nagaland kiba la khang la shi taïew mynta naduh ka Lah Sngi U Blei na ka daw jong ka jingdon ka jingpang ‘ñiangmat ne Conjunctivitis ha ka jylla.
Kine ki skul ki ban bteng ban khang ki long ha Dimapur, Chumoukedima bad Nuiland haduh ka 26 tarik, Nailar, ki la ong.
U shipai ka tnat Assam Rifles, uba la leit phai sha Phek distrik na ka shuti jong u ha u Naitung, u la long uba nyngkong u ban ïoh ïa ka jingphang khmat, la ïathuh u State Programme Officer ka National Programme for Control of Blindness & Visual Impairment (NPCBVI) u Dr. Hoito Sema.
Naduh ka 1 tarik, Naitung, ka jylla ka don kumba 1,006 ngut ki briew kiba la ïoh ïa ka jingpang khmat, ha kaba kane ka la paw ba ka la bun tam ha ka khana shaphang kiba ïoh ïa ka jingpang haduh mynta, u la ong.
Ka Dimapur ka la don bun eh kiba ïoh ïa ka jingpang ha kaba ki la don kumba 721 ngut, ha kaba la bud da ka Kohima da 198 ngut bad ka Mokokchung da 87 ngut, u la bynrap.
Ka jingdon jong kiba ïoh ïa ka jingpang khmat kan sa nang kiew naba kiba bun ki distrik hospital kim pat phah ïa ki kaiphot ba la ïohlum halor ka jingdon jong kiba ïoh ïa ka jingpang, la ong u Sema.
Kum shi bynta ban ai ka jingpynbna ha kaba ïadei bad ka jingkhang ïa ki skul, ki Deputy Commissioners jong ka Chumoukedima, Dimapur bad Niuland ha ka jingphah hukum jong ki, ki la ong ba na ka daw jong ka jingnang bud kiba ïoh ïa ka jingpang, khamtam ki khynnah, bad hadien ka jingïaphylliew jingmut bad ki heh ka tnat ka koit ka khiah bad jong ki heh ba dei khmih ïa ka pule-puthi, la rai ban khang ha ka ban ai jinghikai mar met ha ki skul khnang ban lah ban tem ïa ka jingsaphriang stet jong ka jingpang.
