Khliehriat, Nailar 21
Ka Madanpynriang Sports Club bad ka Pynthorsale Sports Club ki la ïoh khur jingjop ha ka jingïalehkai jong ka lympung 3rd Division Football Tournament kaba la pynïaid da ka East Jaiñtia Hills District Football Association (EJHDFA) bad ruh ban ïoh rung sha ka wat ba ar jong kane ka lympung.
Haba phai sha ka jingïakhun kaba nyngkong, ka jinglah jong ka R Madanpynriang SC ban khur ïa ka jingjop kaba heh, ka la wan lyngba ka jinglah ban ïalehkai bha jong u Rimiki Rymbai uba la khyrwit da ka hat-trick, ha kaba ka Madanpynriang ka la pynliem noh ïa ka Musniang Rim Sports Club da 6-1 kol.
Kane ka jingïalehkai jong ka wat kaba nyngkong kaba la long ha madan Artificial Turf Diengshynrum, East Jaintia Hills District ha ka lah sngi U Blei, ka la long kaba lah shiliang.
Ha kane ka jingïalehkai, ïa ki kol jong ka R Madanpynriang la ïoh ban thep da u Rimiki Rymbai ha ka minit kaba 7, 26 bad 38, u Donaldo Dkhar ha ka minit kaba 14 bad 25 bad u Sanhame Bareh ha ka minit ba 40+1. Katba ïa ka kol jong ka Musniang Rim SC la ïoh ban thep da u Meki Siangshai ha ka minit kaba 59.
Ha kawei pat ka jingïalehkai, ka Pynthorsale Sports Club ruh ka la ïoh rung sha ka wat kaba ar hadien ba ka la lah ban pynliem noh ïa ka Umsatai Sports Club da 1-0 kol. Ïa ka kol jong ka Pynthorsale la ïoh ban thep da u Rishot Phawa ha ka minit kaba 59.
Katba ka jingïalehkai kaba la long hapdeng ka Shymplong Sports Club pyrshah ïa ka Iapmala Wahshnong Sports Club ka la kut noh ha ka jingïakhaid hadien ba ki la ïoh ban khyrwit mar shi kol.
Ïa ka kol jong ka Shymplong SC la ïoh ban thep da u Shiningstar Suchen ha ka minit kaba 29 katba ïa ka kol jong ka Iapmala Wahshnong SC pat la ïoh ban thep da u Juh Lyngdoh ha ka minit kaba 38.
