Seoul, Nailar:
Ki lad pathai khubor ha ka Sngi Nyngkong ki la iathuh ba u nongialam ka North Korea- u Kim Jong Un, u la leit ban jurip ia ka tnat shipai duriaw jong katei ri ha ka sngi ba la pynher ia u ‘namding da katei ka tnat wat hapdeng ki jingmaham jong ki ri ba marjan bad ha kajuh ka por ruh ka United States bad ka South Korea ki dang iatrei lang ban pynkilan bad ban ai jinghikai ia ki tnat shipai jong kitei ki arliang ri.
Kumta, la ong ba u Kim u leit ban jurip ia katei ka bynta jong ka East Sea, kaba la tip kum ka ‘Sea of Japan’ bad u leit ban khmih ruh ia ka jingpynher ‘namding ha katei ka sngi, watla ka US bad South Korea ki la pyrshah jur ia ka jingpynher ‘namding ba khah- khah jongka bad kaba la wanrah jingma ia ki para marjan ri namar ka jingleh bym suitñiew jong ka North Korea haba iadei bad katei ka kam pynher ‘namding ba khlem sangeh.
Hynrei u Kim u la ong ba ka jingthmu jong katei ka jingpynher ‘namding ha katei ka sngi, ka long ban peit thuh ia ka jinglah bad rukom treikam jong kitei ki jhad thma ban ther ‘namding hapdeng ka thma lada ka wan jia hadien- habud.
Watla katta, ym shym la pynshai pat ba ka dei ha kano ka sngi ba u Kim u leit ban jurip sha katei ka tnat shipai bad la shu pyntip ba kane ka dei kaba dang shen ha kine ki sngi ba la leit.
Hynrei, ka South Korea ka la ong ba ka North Korea ka don shibun ki kam buhrieh ba sop- sop jongka, watla ka la pynpaw pyrthei ia ki katto katne ki jingthmu bad ki kam kiba kam lah ban kiar.
