Imphal, Nailar:
Ki la don baroh kumba 212 ngut ki briew kynthup shynrang bad kynthei na Manipur kiba la sah ha ki jaka sah ba shipor ha Myanmar hadien ba la jia ki jingïakynad ha ka jylla Manipur ha ka 3 tarik, Jymmang ki la leit phai da ka jingsuk sha ka jylla ha ka sngi Thohdieng, la ïathuh u Myntri Rangbah jong ka Manipur u N. Biren Singh.
Kine baroh 212 ngut ki dei na ka kynhun Meitei kiba dei ki nongshong shnong jong ka Moreh, ha ki bynta jong ka khappud Myanmar. Na ka liang u Myntri Rangbah jong ka jylla u la pynpaw ka jingsngewnguh ïa ka tnat shipai Indian Army halor ka jinglah jong ki ban pynpoi suk ïa kine ki briew sha Manipur.
