Los Angeles, Nailar:
Katkum ki khubor la ong ba ka nongbah California ha ka Sngi U Blei ka la ioh mad ia u slap uba jur katba ka ‘eriong kaba khlaiñ ka dang wan ban iaid lynti na Mexico ban poi sha katei ka nongbah. Kumta ruh ki bor pyniaid ka nongbah California ki la maham lypa ia ki paidbah ba kin long kiba la pynkhreh namar ki jingma kiba ap na ki jingjia jingshlei um bad kiwei kiwei.
Ha katei ka sngi, la ong ba katei ka nongbah ka la ïohsngew ruh ia u jumai uba la don kumba 5.1 Magnitude uba la pynkhynñiuh ia ka thaiñ South jong katei ka nongbah bad ia utei u jumai la lah ban ïohsngew bha na ka shnong Ojai, hynrei ym shym la ioh khubor ban don kiba shah ktah ne mynsaw ha utei u jumai uba la khñiuh ha katei ka sngi.
Tat haduh ka por shiteng sngi jong katei ka Sngi U Blei, ka nongbah California ka la sakhi ia ka jingjur jong ka lyer kumba 60 miles lane 95 Kilometers shi kynta.
Katba, ha ka janmiet pat, katei ka nongbah ka la ioh mad sa ia u slap uba jur bad uba la khmih lynti ba ki jingjia ki ban bud hadien kane kin long ki jingshlei um, jingtwa khyndew bad kiwei kiwei kiba ju jia hadien ba la ioh mad ia u slap ba jur khlem sangeh.
Kumta, ki tnat ba dei khmih suiñ bneng jong ka ri ki la maham lypa ia ka jinglah ban wan jong ki jingjia kum ki jingshlei um, ki ‘eriong bad kiwei kiwei khamtam ha kito ki jaka kiba katei ka ‘eriong ka dei ban iaid lyngba.
Kumjuh ruh u Lat ka nongbah California, u Gavin Newsom u la pynbna ‘Emergency’ ha ki bynta jong ka thaiñ South jong katei ka nongbah namar ki jingma kiba ap ha ki kynta ki ban wan.
Haba iadei bad kane, ki bor pyniaid ka California, ki la plie ia 5 tylli ki jaka rieh tngen ban iada na ka ‘eriong ba kumjuh ruh la phah kumba 7,500 tam ki briew na ka tnat iarap bad da ki spah ngut ki briew jong ka tnat National Guard, kum shi bynta ban pynkhreh lypa lada donkam ban ai jing-iarap ynda wan kitei ki jingjia kiba sniew.
Kumjuh ruh hapoh ka nongbah San Diego pat, ki pulit ki la pynkhreh lypa ia ki byrni ba la pyndap shyiap, kum shi bynta ban iada na ki jingjia shlei um bad kumjuh ruh la maham ia ki paidbah ba ki dei ban kiar na kaba leit sha ki bynta duriaw ha kum kane ka por.
La ong ba uwei u briew u la duh ei la ka jingim hapoh Mexico hadien ba ka kali ba u shong ka la shah rah sha ka wah kaba don hajan ka surok kaba u iaid lynti bad ki bor pyniaid ka Mexico ki la maham ia ki paidbah haba iadei bad ki jingjia twa khyndew bad kiwei kiwei namar ka jing lynshop jong ki bor ka mariang ha kine ki sngi.
Kumjuh ruh na ka liang ka tnat shipai jong ka Mexico, ka la plie ia 35 tylli ki jaka rieh tngen shipor naka bynta ban ai jingiada ia palat 1,700 ngut ki briew kiba la shah ktah ha katei ka ‘eriong kaba la wan lynshop ha katei ka sngi.
La khmih lynti ruh ba u ‘lap bah uba jur u lah ban ther ia ka nongbah Oregon bad Idaho ha kine ki khyndiat kynta ki ban wan bad kaba lah ruh ban wanrah ia ki jingjia shlei um bad jingtwa khyndew kumba ju long man ka por haba la ioh mad ia u slap uba jur.
Kumjuh ruh ki lah ban don ki jingkhie ‘erlangthari ha ki bynta jong ka Southeast ka nongbah California, ha Western Arizona, Southern Nevada bad kumjuh ruh ha ki bynta Southwest jong ka Utah.
