Beijing, Nailar:
Ka China ha ka Sngi Nyngkong ka la kynnoh ia uwei u nongtrei sorkar halor ka jingdon kti ban syntiat ia ka ri na ka bynta ka United States. Kane ka long ka sien kaba ar ba ka China kan pynbna ia kum katei ka khubor tang hapoh shi bnai.
Ha u bnai ba la dep, ka China ka la wanrah da ka aiñ ban tehlakam bad khang pyrshah ia ki kam syntiat jong ki ri ba nabar kiba thmu ban leit tuh buit ia ki rukom treikam bad ka jinglong jingman hapoh China. Kumta ruh la ong ba ki kyndon naka bynta kitei ki nongleh pynkheiñ aiñ kin long kiba eh namar ka jingbuh jingma jongki ia ka ri China.
Utei u briew uba shah pharep la tip kyrteng kum u ‘Hao’ bad uba la don 39 snem ka rta. Ka tnat Ministry of State Security (MSS) ka la pyntip ba ki tnat wad bniah bad ki kynhun tohkit ki dang tih bniah bad tohkit bniah ruh ia utei u briew la u don kti shisha ne em ha ka ban syntiat ia ka China bad ban phah jingtip sha United States kumba la pharep.
U Hao u la leit pule sha Japan ha ka por ba u iohlad ban iadei kam bad uwei u briew jong ka US uba dei khmih ha ki laiñ ban pynïoh ‘Visa’ ia ki paidbah nongleit- nongwan bad naduh katei ka por, u Hao u la sdang ban don ka jingiadei kaba jan bad utei u briew na US.
La ong ba utei u briew, u la ialam bad pynithuh ia u Hao ha uwei pat u briew uba long u dkhot jong ka Central Intelligence Agency (CIA) bad uba la pynngop ia u Hao ban syntiat ia ka China naka bynta ki kam jong ka US naduh ka por ba la ioh jingtip ba u Hao un wan phai noh sha China.
Kumta, la ong ba u Hao u la soi ia katei ka kontrak bad u la ioh jinghikai bad pyntbit ruh da ka US hi, hashwa ba un ioh ia katei ka kam sorkar ha katei ka tnat kaba u don mynta.
Naduh katei ka por, la ong ba u Hao u la ju iadei kam sop- sop bad ki briew jong ka CIA kiba don hapoh jong ka China, bad u ju ioh pdiang ruh ia ki pisa hadien ba u la phah ia ki jingtip sha kitei ki dkhot ka CIA kumba ki dawa na u.
Ha u Nailar, ka MSS ka la pyllait khubor halor ka jingdon bynta jong uwei u rangbah 52 snem uba la ithuh kum u ‘Zeng’ bad uba ju iatrei lang bad ka CIA ha ka ban syntiat bad phah jingtip sha katei ka tnat na US shaphang ka jinglong- jingman bad ki rukom treikam jong ka China.
