Jowai, Nailar 21
Kum shi bynta ban pynïohlad ïa ki khynnah ba kin lah ban pynpaw pyrthei ïa la ka sap ka phong kaba ki don nalor jong ka pule puthi, ka School Managing Committee jong ka Loompyrdi Iongpiah Upper Primary School, Jowai ha ka Lah Sngi U Blei ka la pynlong bad sdang ïa ka 13th School Week ne ka taïew lehkmen ha Yungwalieh ka Loompyrdi Iongpiah.
Ïa kane ka School Week la wan ban plie da u President bathymmai ka Seinraij Jowai Bah Hercules Toi, ha ka jingdonlang u Bah CA Ram Kyndiah, Secretary SMC, u Bah Bimi L Suwer, General Secretary Loompyrdi Iongpiah, ki dkhot ka School Managing Committee ba kynthup ïa u Bah W Challam bad u Bah KF Laloo nalor ki nonghikai bad ki khynnah skul.
Ïa ka jingïalang la pynïaid da ka Dariker Lato, Asst. Teacher bad la ïoh ka jingkren pdiang na ka Sanki Toi, Asst. Headmistress, ka nguh blei nguh syiem na u Bah BM Shylla, Asst. Teacher.
U Bah Hercules Toi ha ka jingkren u la kyntu ïa ki khynnah ban long ki khynnah kiba shlur ban ïashim bynta ha kino kino ki jingïakop bad ban buh ïa ka jinglehrain shadien namar kane ka dei ka lad ka kabu ksiar ban sngewthuh kaei ka sap kaba phi don.
Shuh shuh u la kyntu ïa ki khynnah ban nang ban kheiñkor ïa ka por bad ri kyndong ïa ka burom ka akor kaba dei ka spah ba khraw ha ka longbriew manbriew kumjuh ïa ka ïing ka sem.
Ka Nitu Chullai, Headteacher Loompyrdi Iongpiah UP School ka la ïathuh ba ïa kane ka School Week la don shibun ki jait jingïakop ban ïohlad ki khynnah ban pynpaw ïa ka sap bad ki rukom ïalehkai pynbyrngia bapher bapher ki ban pynsngewtynnad ïa ka jingsngew jong ki khynnah bad ïa kane ka School Week yn pynkut ha ka 25 tarik Nailar.
