Agartala, Nailar:
Kum shi bynta ban lah ban ïakhun pyrshah ïa ka jingpyndonkam ïa u drok, ki pulit jong ka Tripura ki la ïoh ban kem ïa lai ngut ki briew bad ïoh ruh ban kurup ïa u Brown Sugar uba la kot sha ka T. 10 klur hynnin ka step.
Kane ka jingjia ka la jia ha Churaibari, kaba don ha North District jong ka Tripura kaba ïasam ïa ki bynta u pud u sam bad ka khappud Assam-Tripura.
Ha ka jingïakren bad ki nongthoh khubor, u North District Superintendent of Police, ub Bhanupada Chakraborty u la ong ba ki la ïoh jingtip hashwa halor ka jingdon jong kine ki briew kiba la ïaid lynti ba leit sha Tripura na Assam ha ryngkat shibun ki song jong u Brown Sugar.
“Naduh ka 19 tarik, Nailar ha baroh ki bynta jong ka Tripura, ki pulit ki la buh da kumba 16 tylli ki Naka Checkpoint kiba thymmai hapoh ka hukum jong u Myntri Rangbah ka Tripura u Dr Manik Saha. Ha kaba ïadei bad kane, ngi la ïoh jingtip ba kine ki lai ngut ki briew ki la rung ha Tripura na Assam da ka Tata Sumo ha kaba ki la kit ïa shibun ki song jong u Brown Sugar”, la ïathuh u SP.
U la ïathuh shuh shuh ba haba kine ki lai ngut ki la rung ha Tripura, ki pulit ki la bat noh ïa ka kali bad kem ïa ki. Ka jingtohkit ïa kine kiba la shahkem ka dang ïai bteng.
