Shillong, Nailar 21
Ka Manchester United ha ka sngi Nyngkong ka la pyntip ba u Mason Greenwood un sa mih noh na ka club wat la dep ban pynkut noh ïa ka jingtohkit halor ki kam runar ba thmu batbor naduh ki hynriew bnai mynshwa.
Une u rangïalehkai shakhmat ka England ba dang 21 snem ka rta um shym la don bynta bad ka United naduh u bnai Kyllalyngkot jong u snem 2022 bad mynta ruh ka lawei jong u kam pat long shai hadien ba ka club ka la sdang ïa la ka jong ka jingtohkit.
“Baroh kito kiba don bynta, kynthup ruh ïa u Mason, ki la ïohi lypa ka jingeh bad u ban dang bteng ïa ka jingim ïalehkai hapoh ka Manchester United,” la ong ka club ha ka kyrwoh khubor. “Dei halor kane, ba la ïa poi sha ka jingïasngewthuh jingmut ba kan long kaba bha na ka bynta jong u ban mih noh na kane ka club bad kumta ngin ïatreilang bad u Mason na ka bynta kata ka bynta,” la ong ka Club.
U Mason Greenwood u la ong “Ka rai kaba biang tam na ka bynta baroh lang, ka long ba ngan bteng ïa ka kam ïalehkai phutbol da kaba mih noh na Old Trafford, ha kaba ka jingdon ka jong nga, kan nym ktah pat ïa kiwei ha kane ka club.”
U Mason u la ong, “Nga pdiang ba nga la leh bakla ha ka jingïadei ka jong nga, bad nga shim lut ïa ka jingkitkhlieh halor kane ka jinglong jingman baroh, kaba la lam shaduh ka rynsan social media. Ka jingthmu jong nga, ka long beit ban long u nongïalehkai phutbol ba tbit, hynrei kaba kham kongsan eh ka long ba ngan long u kpa uba paka, u briew uba biang bad ban pyndonkam ïa ka sap ka jong nga, la ha madan ne shabar ka madan ruh kumjuh.”
