Imphal, Nailar:
Ka jingjia ïa u khynnah uba dang 7 snem ka rta uba don ïa ki kmie ki kpa khleh na ka kynhun jait bynriew Kuki bad Meitei uba la shah thang im lang bad ka kmie jong u bad ka kmienah ka la long kawei na ki 20 tylli ki mukotduma ba la aiti da ki pulit jong ka Manipur sha ka kynhun CBI, kaba la sdang ban pynlong ïa ka jingtohkit ha kaba ïadei bad ki jingïakynad kiba la mih ha ka jylla naduh ka 3 tarik, Jymmang, la ïathuh ki heh pulit.
Ka jingïakynad ka la long hapdeng ki jait bynriew Kuki bad Meitei hadien ba la pynlong ïa ka ‘Tribal Solidarity March’ ba la pynlong ha kine ki distrik ban pyrshah halor ka jingdawa jong ka kynhun Meitei ban kynthup ïa ka kynhun jait bynriew hapoh ka kynhun Scheduled Tribe (ST).
Ki la don palat 160 ngut ki briew kiba la shah pynïap bad da ki spah ngut ki la mynsaw ha ka jingïakynad.
Une u khynnah ïa uba la tip kyrteng kum u Tonsing Hangsing, u la ïap haba ka kali kit nongpang ba la synran da ki pulit ka la shah thombor ha ka kynhun jong u paid bhur bad shah thang ha Iroisemba kaba don ha West Imphal distrik ha ka 4 tarik, Jylliew.
Ka kmie jong u bad ka kmienah ka Meena Hangsing bad ka Lydia Lourembam, ki la pynkit ïa u sha ka jaka ai jingsumar ha ka nongbah hadien ba u la mynsaw na ka jingdei kuli ha ki bynta jong ka khlieh ha ka por ba la don ka jingïasiat kaba markylliang hapdeng ki shipai bad ki riewkieng atiar.
Ka kmie jong une u khynnah ka dei na ka kynhun jait bynriew Meitei, katba u kpa jong u u dei na ka kynhun jait bynriew Kuki.
