D. H. Kharkongor
Ynda haba bishar bniah bha, na baroh ki liang, ka Ri Lum Khasi Jaiñtia ne ka Bri U Hynñiewtrep ka lahdonkam ban don lem noh ym tang ïa la ka jong ka kad liengsuin kaba kum ka Lokpriya Gopinath Bordoloi Airport, Guwahai, hynrei haduh ïa la ka jong ka kad Rel, kaba kum ka Guwahati Railway Station. Kumba nga lah dep pashat jingmut ba katba ngin pat lah ban don hi noh ïa la ka jong ka Kad Liengsuin bad ruh ïa la ka jong ka Kad Rel ba ka jingmyntoi kan dang iai long ïa ka jylla Asombad khamtam eh ïa ka Guwahati), khlem da klet ruh de ïa baroh ki kynhun kiba pyrshah ïa kitei ki ar. Ka jingduh jingmyntoi pat de kan dang ïai long pynban ïa ngi u paid ba bun jong ka Bri U Hynñiewtrep.
Ngi ïa tip baroh ba ka Guwahati Railway Station ka jngai kumba 100 Km na kane ka nongbah Shillong katba ka Lokpriya Gopinath Bordoloi Airport, Borjhar, Guwhati, pat de ka jngai kumba 130 Km na kane ka nongbah Shillong. Wat ynda kumne mynta pynban nangne na ka nongbah Shillong tad haduh nangtei ha ka Guwahti Railway Station ka dang shim por la kumno kumno haduh 2 kynta shiteng, katba tad haduh ha ka Lokpriya Gopinath Bordoloi Airport ka shim por la kumno kumno haduh 3 kynta. Ka por kumba ngi ïa tip baroh ka long kaba kordor. Nga ngietngi sngewthuh shai kdar bha ruh haduh katto ka jinghap ban shong kali kaba haduh 2.5-3 kynta ka ktah jur bha naduh ïa kiba la noh arsut ka yrta tad haduh ïa kiba dang khyllung khynnah bad kiba dan lung ka met ka phad. Kaba katno tam ïa kiba pang kiba shitom jur bad kiba donkam ban poi kloi lan, katlah katïai, sha ki jaka sumar kiba kham kynsai bad kiba don sha palat jong ka jylla Asom, kata, sha kiwei kiwei pat ki Sor jong ka Ri India. Nga ngeit ngi ïa sngewthuh shai bha ruh ïa ka jinglut ka jingsep kaba ïadei bad ka jinghap ban ïaid ïa ka lynti kaba jngai bad kaba kyllain, da ka kali, kaba haduh 2.5 – 3 kynta. Kaba katno tam lada hap ban leit ban wan hakdak ne mynmied mynïong da ki kali kamai.
Ka da ktah jur bha khamtam lada dei ban leit buh kyrpang ïa ki nongleit nongwan tnoit tad haduh ha ka Lokpriya Goponath Bordoloi Airport bad sa wan phai biang pat ïalade shane sha ka Nongbah Shillong. Ka jinglatpor, kaba duna eh ruh, kan long la kumno kumno 7 kynta. Kata 3 kynta tang ha kaba leit, 1 kynta ha ka Airport ne ka KadLiengsuin bad sa 3 kynta biang tang ha kaba wan phai biang shaduh shanesha ka Nongbah Shillong. Lah ban ong ba ka long ruh kumta kumjuh ynda haba hap ba mih kyrpang nangne na ka Nongbah Shillong, kata, ban leit shaw kyrpang ïa ki tad naduh na ka Lokpriya Gopinath Bordoloi Airport. ïa u nongniah lei te ba ka jingthait ka jingjrem ka long haduh arshah. Ka jinglut jingsep, khamtam ha ka liang ka umphiang kali ne ka (POL) ruh, kaba ar shah. Ka long ruh kumta ha kaba ïadei bad ka jingsiew ha kato ka Toll Plaza. Ka long hi kumta kumjuh ynda haba hap ban mih kyrpang nangne na ka Nongbah Shillong na ka bynta ban leit on kyrpang ne ban leit shaw kyrpang tad haduh ka Guwhati Railway Station.
Ha kaba ïadei bad ka leit jingleit, shabar jylla, da ka Rel ba nga kynmaw ba mynno mynno hap ban mih leit sah lypa shimied hangtei ha ka Sorbah Guwahti, kata, lada kwah ban lait ym tang na kaba hap ban siang thiah mied ha ka Railway Platform ne thiah da shong hapoh ka Railway Waiting Room. Ym aratien ba kiba bun napdeng ki khynnah samla ki jong ngi, kiba ju pule pyntbit kham kyrpang sha kitai kiwei pat ki jylla pdeng bad ki jylla lam sepngi jong ka Ri India, ki lah dep ïa mad bunsien bha ïa kum kata kaei kaei. Lada kwah ban lait ia kata kaei kaei ne lada kwah ïa ka jingjahthait kaba shisha hap ban leit sah ne leit thiahmied lypa ha kano kano ka Hotel, kaba don ha syndah jong ka Guwahati Railway Station. Ka long kumta wei ba hap ban leit da ka Rel ne da ka ‘Train’ kaba mih na Guwahti Railway Station shwa ban shai ka suiñbneng ne kaba mih dang step phyrngab bha ir. Ka sah Hotel ka dei ka kam kaba shu lut ksan kai wei ba sah ruh tang da ki khyndait kynta. Ha kita ki por ka long ruh kumta kumjuh wat ïa kiba hap ban leit jingleit da ka Liengsuiñ, kaba mih naka kad Liengsuiñ Guwahati, kaba mih khyndiat kynta shwa jong ka shiteng sngi. Hap ban sahmied lypa ha kano kano ka Hotel kaba don hapoh ka Sorbah Guwhati, na kaba hap ban mih pat nangta dang step phyrngab bha ir na ka bynta ban beh wia wia sha Borjhar, kata, sha ka Guwhati Airport. Te sa katno snem ngin dang ïai theh kai ïa la ka jong ka umsyep hangtei ha ka Nongbah Guwahati, jong ka jylla Assam?
Ka por ka la dei ba ngi u paid Hynniewtrep ngin ïa don lem noh ym tang ïa la ka jong ka Kad Liengsuiñ kaba kum ka Lokpriya Gopinath Bordoloi Airport, Guwahati, hynrei haduh ïa la ka jong ka kad Rel, kaba kum ka Guwahati Railway Station. Ngi donkam ba kin don la kumno kumno tang kumba 25 Km na kane ka Nongbah Shillong ka jong ngi. Ha kaba iadei kyrpang beit thik bad ka jingkyntiew ïa ka kam jngoh kai pyrthei ne ka rkai pyrthei ne ka ‘Tourism’ ba nga ngeit kan bha ba ngi ruh ngin ia don lemruh ïa ki ‘Heritage Train’, kiba kum jong ka Darjeeling bad ka Simla. Ngim dei ban dang iaikhim jingmut jingpyrkhat than eh kumba ngim dei ruh ban dang ïaikhim mynsiem than eh. Ngim dei ruh ban dang ïai shah ïalam bakla ne ban ïai shah pynsngewthuh bakla. Ha shwa ba ngin shu ïai ïapyrshah jur beit, la ïa kaei kaei ruh, ba ngi dei ban da thew da woh ne dok tarajur ïa ki jingduh jingmyntoi bad ïa ki jingioh jingmyntoi na kata kaei kaei.
