Shillong, Nailar 22
Ka Seng Khasi College ka la lah ban pynliem kput ïa ka Mawlai Presbyterian College ha ka jingïalehkai jong ka lympung NEHU Inter College Football (Men) Tournament 2023 kaba la long ha ka sngi Ba-ar ha madan ïalehkai ka SAI ha NEHU.
Haba phai sha katei ka jingïalehkai, ki rangïalehkai ka Seng Khasi College naduh kaba sdang ki la lah ban ïalehkai bha bad ban ñion tyngeh khamtam ïa ki rangïalehkai dien jong ka Mawlai Presbyterian, ha kaba ki la ïoh ban khyrwit syndon haduh 12 tylli ki kol bad khlem da ailad ïa ka Mawlai Presbyterian ban ïoh wat tang shi kol ruh.
Ha kawei pat ka jingïalehkai jong kane ka lympung, ka Union Christian College, Umiam ka la lah ban pynliem noh ïa ka Don Bosco College, Byndihati da 4-0 kol.
Katba ka jingïakhun hapdeng ka Smit College, Shillong pyrshah ïa ka NEIAH, Shillong ka la long kaba ïakhaid bha ha kaba baroh ar liang mamla ki la ïakhun tyngeh ban wad ïa ka jingjop bad ha kaba kut, ka Smit College ka la khur jingjop da 1-0 kol.
Ha ka jingïalehkai kaba khatduh jong kane ka sngi, ka Kiang Nangbah Govt. College, Jowai ka la lah ban pynliem noh ïa ka Balawan College, Umsning da 2-0 kol.
Ki jingïalehkai ki ban long pat ha ka 23 tarik mynta u bnai, ka NEIGRIHMS kan ïakhun pyrshah ïa ka JJM Nicholas Roy College, ka Riwar College, Pynursla kan ïakhun pyrshah ïa ka Shillong Law College, ka Nongtalang College kan ïakhun pyrshah ïa ka St. Edmund’s College bad ka NEHU, Shillong kan ïakhun pyrshah ïa ka Phukan Memorial College, Dalu, West Garo Hills.
