Shillong, Nailar 22
Kum shi bynta ban rakhe ïa ka National Sports Day 2023, ka Meghalaya State Olympic Association (MSOA) ryngkat ka jingïatreilang bad ka Directorate of Sports & Youth Affairs (DSYA) bad ka District Sports Officer East Khasi Hills kan pynlong da ka jingïakop mareh kaba la tip kum ka 5K Fitness Run.
Ïa kane ka jingïakop mareh yn pynlong ha ka 26 tarik mynta u bnai, ha kaba yn ai ei ïa ki T-shirt sha kito kiba poi nyngkong ha shwa ban sdang ka jingïamreh bad nalor kane yn pynbiang ruh ki jingbam hadien ba la dep ka jingïamreh sha baroh ki nongïashim bynta.
Nalor kane, la pynkhreh ruh ïa ki 50 tylli ki song ai sngewbha kiba kyrpang sha kito ki nongmareh ki ban long kiba donbok ha kane ka sngi. Ka jingthmu jong ka jingpynlong ïa kane ka jingmareh ka long ban pynrung ïa ka mynsiem jong ka jingdon ïa ka met ba koit ba khiah jong ki nongshong shnong ka jylla kata na ka bynta ki samla bad kito kiba la noh ka rta ruh kumjuh.
Ïa kane ka jingïakop mareh yn sdang na ka khyrdop jong ka madan SSA Stadium, kata ha ka por 6.30 mynstep bad kumta ki nongïashim bynta ki la dei ban wan pyntip lypa naduh ka por 6 baje mynstep bad kane ka jingïakhun kan long na ka bynta baroh kynthei bad shynrang.
Kino kino kiba kwah ban ïashim bynta ha kane ka jingïakop mareh, ki lah ban leit ai kyrteng ha ka ophis treikam jong District Sports Officer, Shillong ha ki kynta long trei, kata haduh ka 25 tarik mynta u bnai.
