Shillong, Nailar 22
Kum shi bynta jong ka jingrakhe ïa ka National Sports Day, ka Sorkar Jylla ka la pynbna da ki prokram ïalehkai bad ki prokram pynkoit pynkhiah met ha baroh ki shi taïew ha kylleng jong ka jylla ka ban long hapdeng ka 22 haduh 29 tarik mynta u bnai.
La kyrpad bad ai mynsiem ïa baroh ki nongshong shnong ba kin ïaleh ban ïashim bynta ha ki kam ïalehkai bad ki prokram bapher bapher ba la pynkhreh na ka bynta ka taïew baroh kawei.
Kane ka jinglehkmen kan dei ruh kum shi bynta jong ka lynti ba la shim bad pynlong da ka Ministry of Youth Affairs and Sports. Na ka liang jong ki nongïashim bynta kin sa bam smai ruh halor ka ‘FitIndia Pledge’ ha kylleng ki bynta jong ka ri, bad ka Meghalaya ruh kan ïashim bynta lyngba ki nongshong shnong jong ka ba kin shim ka smai bad kyntiew ïa kane ha ka rynsan social media.
Bun ki jingïalehkai bad prokram yn sa pynlong ha kylleng ki bynta jong ka jylla da ki Sports Association, ki School, bad ki bor pynïaid district na ka bynta baroh ki ban ïashim bynta.
Nalor kane, ki tnat ka sorkar jylla kin sa shim bynta ruh ha ki jingïalehkai, kum ka Football, Cycling, Walkathons, bad Basketball. Ka sorkar kan pynshlur ruh ban wan sha ki jaka trei da ki Cycle ne shu ïaid kjat, ïa kaba yn sa pynbna shen.
Ïa kum kine ki jingïa-lehkai yn sa pynbna bad pynlong ruh da ka NYKS bad ka SAI hapoh ka jylla.
Ka sngi ba kham khraw kan dei ha ka 26 bad 29 tarik mynta u bnai, ha kaba ha ka 26 tarik kan don ka jingïakop mareh ba la tip kum ka “Run for Fitness” ha nongbah Shillong.
Ha ka 29 tarik pat kan don ka jingïalang kaba rit ha kaba yn sa sam ïa ka khusnam pisa ban sa sam sha kito kiba jop bad nalor kane, kin don ki prokram tynrai.
Ka prokram ba kham kyrpang ha kane ka sngi, kan dei ruh ka jingïalehkai phutbol paralok hapdeng ki ophisar ka jylla pyrshah ïa ki MLA ban pynlong ha madan MFA Ground, Polo.
