Beijing, Nailar:
Ha kane ka khubor, la ong ba hadien 3 snem ba katei ka liengsuiñ jong ka North Korea kam shym la leit hiar shuh sha China, ha ka Sngi Ba-ar, ka la leit iuh kjat biang ha Beijing hadien ka jingsdang biang jong ka China bad North Korea ban iatrei lang kumba ju long ha ki por ba la leit.
Katei ka liengsuiñ Air Koryo JS151 ka la leit poi ha ka Kad Liengsuiñ jong ka nongbah Beijing ha China ha ka por kumba 9:17 mynstep.
Ka long ruh ka sien ba nyngkong ia katei ka liengsuiñ ba kan leit iuh kjat biang sha China naduh ba la sangeh ha u snem 2020 ba wan lynshop ka khlam Covid ia ka China bad ia ki ri ka pyrthei baroh kawei, ha kaba ka North Korea ka la khang khyrdep noh ia baroh ki khyrdop khappud ban rung bad ban mih namar ka jing sheptieng ia ka khlam Covid-19.
Kumta, la ong ba katei ka liengsuiñ ka la mih na ka nongbah jong ka North Korea ha ka por kumba 8:30 mynstep.
Watla, ki bor pyniaid ka Air Koryo ki la thmu ban phah ia katei ka liengsuiñ sha Beijing ha ka Sngi Nyngkong, hynrei ki la pynsangeh noh hadien ba ki kam- ki jam bad ki jingpynbeit kim pat biang lut.
Namar la ong ba ka North Korea ka la kiar na baroh ki ri jong ka pyrthei naduh u snem 2020 bad ka la khang ia ki khyrdop khappud jongka, kum shi bynta ban tehlakam ia ka jingpur bad jingsaphriang ka khlam Covid bad kumjuh ruh naka bynta ka jingshngaiñ jong ki paidbah nongshong shnong ka ri hi.
