Aizawl, Nailar:
Ka seng Congress ha Mizoram ka la buh ka jingkynnoh pyrshah ïa ka seng kaba bat ïa ka jingsynshar ka Mizo National Front (MNF), ha kaba ka la pynshisha ba ka la pyndonkam bakla ïa ka pisa kaba la kot sha ka T. 178 klur ba la mang na ka bynta ban pyntreikam ïa ka Project ban shna ïa ka surok Meidum-Hortoki. Ïa ka pisa la mang kumba T. 44 klur halor ka bynta kaba nyngkong bad T. 133 klur halor ka bynta kaba ar.
Ïa ka pisa la ïoh naba la treikam ka Loan na ka National Bank for Agriculture and Rural Development (NABARD) na ka bynta ban ïarap pynbha ïa ka surok. Ka Congress Vigilance Cell ka la shim ïa ki sienjam na ka bynta ban khmih bniah halor kane, ha kaba ka la phah ïa ka jingujor First Information Report (FIR) sha ka Mizoram Lok Ayukta, kum shi bynta ban pynpaw ïa ka jingshimkhia halor ka jingdon jong ka jingpyndonkam bakla ïa ka pisa.
Ha ka por ba la wanrah ïa ka jingthmu pyntreikam ïa ka kam jong ka bynta kaba nyngkong la aiti sha u RV Hluna na Edenthar, katba ïa ka bynta kaba ar la ai ban shim kontrak da u Zoramchhana na Electric Veng. Shuh shuh la ong ba u Lalthanthuami na Chawnpui, Aizawl, bad u V Lalbiakzama na Venghlui, Aizawl, ki la don bynta lang ha ka jingpyntreikam ïa kane ka Project.
