Arunachal, Nailar:
U Myntri Rangbah barim jong ka Arunachal u Gegong Apang u la seng da ka seng saiñ pyrthei lajong ka Arunachal Democratic Party (ADP), halor ka jingthmu ban ïakhun ïa ka ilekshon ha baroh 60 tylli ki Assembly konstitwensi jong ka ilekshon Assembly ka ban sa long ha u 2024.
Ha ka jingai jingkren sha ki nongthoh khubor ha Press Club, u nongseng bad u President jong ka seng ADP u Apang u la ong, “Ka daw tynrai halor ka jingseng jong nga ïa kane ka seng ka long halor ka jingïohi ïa ki jinglong jingman kiba mynta ha ka jylla ha kaba kam bha shuh khamtam ha kaba ïadei bad ka pule puthi.”
U la buh ka jingdawa ban kynthup ïa ka jylla hapoh ka 6th Schedule, bad ong ba ka seng kan sa trei tang na ka bynta ka jingbha bad ka jingmyntoi jong ki briew ka jylla bad ban pynim ïa ka seng ADP.
“Ka seng ka la ong ba ka jingthmu jong ka ka long ban wanrah ki jingkylla na Tawang sha Longding, lyngba ka jylla,” bad kyntu ïa ki samla ba kin pynïasoh bad ka khnang ban wanrah ki jingkylla.
