Guwahati, Nailar:
Ki briew kiba la shah suba nongkhaïi drok ki la shahkem ha ki nongshong shnong jong ka Lanka ha Hojai, kaba don ha Assam ha ka step phyrngab ka Lah Sngi U Blei.
Ïa uwei na kiba la shah kynnoh donkti ha ka kam khaïi drok la tip kyrteng kum u Sabbir Ahmed bad u la donkti bad uwei pat, ha kaba ïa une ruh la suba ba u dei u nongkhaïi drok.
Ha kaba ïadei bad kane, uwei pat u la lait phet noh, hynrei hadien ka jingleit kthong ïa u la ïoh ban kem noh. Ïa kine ki nongkhaïi drok la ïohkem najan Lanka Junior Secondary School bad Ex-Servicemen School halor ka jingshah suba ba ki la donkti ha ka kam khaïi drok.
Ki nongshong shnong ki la pynshisha da kaba ong ba ki la lap ruh ïa ki song ba la thep ïa u drok Heroin na u Ahmed. Ïa kine kiba la shahkem la aiti sha ki pulit jong ka Lanka. Ki pulit ki la pynlong ka jingtohkit kaba bniah ïa kine kiba la shahkem. Ïa ka song ba la ïoh ban kurup la phah na ka bynta ka jingphah peit bniah.
