Tokyo, Nailar:
Ka Japan ha ka Sngi Ba-ar, ka la pyntip ba ka North Korea shen kan sa leit buh ia u ‘Satellite’ lajong ha kine ki khyndiat sngi ban wan.
Katkum ka jingioh jingtip jong ka Japan, la ong ba ka North Korea kan pynurlong ia katei ka jingthmu hapoh une u Nailar. Kane ka lah ban sdang naduh ka 24 haduh 31 tarik bad ka shong katkum ka jing ibit jong ka tnat shipai ka North Korea kumba la dep thmu ban leh ia kane naduh u Jymmang ba la leit hynrei ki don noh ki jingthut bad katei ka jingthmu ka la pulom bad sah teng noh.
Ha u Jymmang, ka North Korea ka la pyrshang ban leh ia kane, ha kaba la ong ba kane kan long ka jingpyrshang ba nyngkong eh jong ka tnat shipai katei ka ri ban leit buh ia ki kor ‘Satellite’ sha haw-haw hynrei kane ka kam ka la pulom noh tang hadien khyndiat por ba la pyrshang ban pynkiew shalor suiñ bad utei u Satellite u la leit hap noh sha duriaw.
Kumjuh ruh na ka liang ka North Korea, ka la pyntip ba ka la dep ban shna ia u ‘Spy Satellite’ naka bynta ka jingshngaiñ jong ka ri haba iadei bad ka jingleit tur jong ka United States bad ka jingdon ki shipai ka US hajan u pud- u sam ka ri.
Kumta, la ong ba ka United States, ka South Korea bad ka Japan, ki la pynrem jur halor katei ka jingthmu jong ka North Korea ban wanrah ia kitei ki kor Satellite tang ban ioh syntiat bad la ong ba kane ka lah ban long ka jingpynkheiñ ia ka aiñ ba la buh da ka United Nations haba iadei bad ka jingwanrah ruh ia ki tiar ‘namding ‘Ballistic Missile’.
Hynrei, u nongialam jong katei ka ri, u Kim Jong Un, u la ïaroh ia ka jinglah jong ka tnat shipai ka North Korea ban wanrah ia kum kitei ki tiar ki ban pynkhlaiñ ia ka jingiada bad wanrah ruh ia ka jingshong shngaiñ hapoh ka ri.
Kumjuh ruh na ka liang jong ka South Korea, ka la dep iathuh lypa ha ka taiew ba la leit ba ka North Korea ka lah ban leit buh Satellite hapoh jong une hi u Nailar lane ha ki taiew ba sdang jong u Nailur u ban wan.
Kane ka jingleit buh Satellite jong ka North Korea ka long ruh hashwa ka jingrakhe ia ka jingdap 75 snem jong katei ka ri, ka ban long ha ka 9 tarik u Nailur.
