Guwahati, Nailar:
U Myntri barim jong ka Tripura bad u MLA jong ka seng Congress u Sudip Roy Barman u la ong ba ka heh nongïalam jong ka seng Congress ka Priyanka Gandhi Vadra ka la thmu ban leit jngoh ïa ka jylla kaba la shah ktah na ka jingïakynad ha Manipur bad Tripura.
Ha ka por ba la ïakren bad ki nongbud jong ka seng ha Agartala ha Pradesh Congress Bhavan, u Roy Barman u la ong ba u la dep ban ïakren bad ka Priyanka ha kaba ïadei bad ka jingthmu jong ka ban leit jngoh ïa ka Tripura.”Nga la dep ban ïakren lypa bad ka nongïalam jong ngi ka Priyanka Gandhi Vadra, bad ka la thmu ban leit jngoh ïa ka Manipur bad ka Tripura shen,” la ong u Roy Barman. U la ong ba ha ka jingleit jong ka sha Tripura, ka nongïalam jong ka seng Congress kan sa leit ban jngoh ïa ka Tripureswari Temple ha Gomati distrik.
