Shillong, Nailar:
Ka NSE Foundation, kaba long ka shnat kaba pyntreikam ïa ki bun tylli ki jingshakri kiba long ki jingnoh synñiang sha ka imlang sahlang ne CSR jong ka National Stock Exchange of India Limited (NSEIL), ka la lah ban thaw ïa ka jaka ban leh ïa ka CT scan ha ka Indian Army’s 92 Base Hospital ha Srinagar (J&K). Ia kane ka jaka ban leh ïa ka CT scan la plie pyrda da u Lieutenant Governor U Manoj Sinha, ha ka jingïadon lang jong u Lieutenant General Rajiv Ghai (15 Corps Commander) bad u Ashishkumar Chauhan, MD & CEO, NSEIL.
Ka 92 Base Hospital ha Srinagar (J&K) ka dei ka hospital kaba don 598 jingthiah bad kaba long ruh ka hospital kaba lah ban ai jingsumar ba kyrpang. Ki tiar ki tar ba la ai sha kane ka hospital ki long ki tiar ki tar kiba thymmai bad kiba long katkum kane ka juk ba mynta ba la pynmih da ka GE (Revolution Maxima) kiba long ki tiar ki tar kiba khlaiñ, kiba treikam bha bad ki long ruh ki CT scan kiba lah ban shaniah.
U Lieutenant Governor u Manoj Sinha u ong, “Kane ka jaka treikam kaba thymmai kaba don ïa ki tiar ki tar na ka bynta ban leh ïa ka CT Scan ki long kiba donkam bha haduh katta katta na ka bynta ban ai ïa ki lad ai jingsumar sha ka imlang sahlang. Kin wanrah shisha ïa ka jingkylla na ka bynta ban ai jingsumar bad kan long ka jingmyntoi na ka bynta ki nongpang. Ngi sngewkmen ba ka NSE Foundation ka la shim ïa kane ka bynta kaba bha na ka bynta ban kyntiew ïa ka jingdon jong ki tiar ki tar ha kane ka hospital.”
U Lieutenant General U Rajiv Ghai, 15 Corps Commander u ong, “Kane ka sienjam treikam da ka NSE Foundation kan long ka sienjam treikam kaba kongsan bha na ka bynta ka 92 Base Hospital bad ka la ïarap ban pynïoh ïa ki kor ki bor teknologi kiba bha bad kiba long shisha kiba donkam na ka bynta ki lad ai jingshakri ha ka liang ka koit ka khiah. Na ka liang jong ka tnad shipai Indian Army, nga kwah ban pynpaw ïa ka jingkmen bad jingïaraoh ïa ka NSE Foundation kaba la shim ïa kane ka bynta ba kongsan.”
U Ashishkumar Chauhan, MD & CEO, NSE u ong, “Ka NSE ka trei tyngeh na ka bynta ban noh synñiang sha ki kam jong ka tnad shipai kaba don shisha ka bynta kaba kongsan ha kaba ïadei bad ka jingïada ïa ka ri. Ngi sngew kmen ban ïoh ïa kane ka lad ka lynti ban noh synñiang sha ka bha ka miat jong ki shipai, kiba aiti ïa ka jingim jong ki man la ka sngi ban peit bad wanrah ka jingshngaiñ ha ki thaiñ khappud. Ngi kyrmen ba kane ka sienjam treikam kan ai jingkyrshan ha ka liang ki lad ai jingshakri ha ka koit ka khiah na ka bynta ki shipai bad ki nongshong shnong ha Jammu bad Kashmir.”
