Shillong, Nailar 23
Ka JJM Nichols Roy College ka la lah ban pynliem kput ïa ka NEIG-RIHMS ha ka jingïaleh-kai jong ka lympung NEHU Inter College Football (Men) Tourna-ment 2023 kaba la long ha ka sngi Balang ha madan ïalehkai ka SAI ha NEHU.
Haba phai sha katei ka jingïalehkai, ki rangïaleh-kai ka JJM Nichols Roy College naduh kaba sdang ki la lah ban ïalehkai bha bad ban ñion tyngeh khamtam ïa ki rangïaleh-kai dien jong ka NEIG-RIHMS, ha kaba ki la ïoh ban khyrwit syndon haduh 9 tylli ki kol bad khlem da ailad ïa ka NEIGRIHMS ban ïoh wat tang shi kol ruh.
Ha kawei pat ka jing-ïalehkai jong kane ka lympung, ka Riwar College, Riwar ka la lah ban pynliem noh ïa ka Shillong Law College da 5-1 kol.
Katba ka jingïakhun hapdeng ka St Edmund’s College, Shillong pyrshah ïa ka Nongtalang College, Nongtalang ka la kham itynnad bad kham shongshit hynrei ha kaba kut, ka St. Edmund’s College ka la jop da 3-0 kol ïa ka Nongtalang College.
Ha ka jingïalehkai kaba khatduh jong kane ka sngi, ka NEHU Shillong ka la lah ban pynliem noh ïa ka Phukan Memorial College, Dalu na West Garo Hills da 5-1 kol.
Ki jingïalehkai ki ban long pat ha ka 24 tarik mynta u bnai, ka Shangpung College, Shangpung kan ïakhun pyrshah ïa ka Khadsawphra College, Mairang, ka Khrawsing Christian College, Mawngap kan ïakhun pyrshah ïa ka Ri Bhoi Synod College, Umsning, ka Jaintia Eastern College kan ïakhun pyrshah ïa ka Shillong College bad ka BBS College kan ïakhun pyrshah ïa ka Shillong Commerce College.
