Shillong, Nailar 23
Ka skul OM Roy Memo-rial Higher Secondary ka la sdang ïa ka jingïalehkai jong ka lympung IXth Inter School Knock-Out Football Tournament 2023 da ka jingjop hadien ba ka la pynliem noh skul Jaiaw Presbyterian.
Ïa katei ka lympung ba la pynlong da ka Fede-ration of Khasi Jaiñtia and Garo People (FKJGP) Mawlai Circle, la plie pyr-da ha ka sngi Balang ha Madan Heh Mini Sta-dium Mawlai Phudmuri.
Haba phai ha katei ka jingïalehkai ba nyngkong eh jong katei ka lympung, ka OM Roy Memorial Higher Secondary School ka la khur ïa ka jingjop kaba heh, da kaba pynliem noh ïa ka Jaiaw Presby-terian School da 6-1 kol.
Ka jingïalehkai ha katei ka sngi, watla ka la itynnad hynrei namar ka jingkhlaiñ shiliang ha ka jingthep kol, ka la noh shiliang hynrei watla katta ruh ki khynnah ïalehkai na baroh ar liang ki la ïakhun tyngeh naduh kaba sdang haduh ba kut.
Haba phai sha ka jing-ïathep kol, u Banteilang Syngai ka OM Roy u la ïoh ban khyrwit syndon ïa ka hat-trick, katba u Risjoy Syiemlieh u la ïoh ban thep ar kol bad u Samborlang 1 kol. Katba ïa ka shi kol jong ka Jaiaw Presbyterian pat la ïoh ban thep da u Wankam Disiar lyngba ka penalty.
Ha kane ka lympung ïalehkai Inter School ba khyndai jong seng ha kane ka kynti kaba mynta ki don baroh 15 tylli ki skul kiba la poi ban ïashim bynta, kiba kynthup ïa ka O.M Roy Memorial School, Jaiaw Presbyterian School, Christ Church Morning School, Nongkwar UP School, Nongkwar Presbyterian School, MLP School, Grace Care Academy, Christ Church Day, Mawlai Presbyterain Secondary School, Chris-tian Academy School, Mayqueen School, St. Denis School, Stephan Memorial School, Umryn -jah School bad ka Nongkwar Secondary School, kaba la ïoh rung lypa sha ka quarter-final.
Kane ka dei ka lympung ïalehkai phutbol kaba ka seng ka ju pynlong manla u snem bad ha une u snem ba mynta na ka liang ka Seng ka la buh ruh ïa ka phang pdeng kaba ong, “Em ïa u Drok, Hooid ïa ka Phutbol”.
Ha kane ka sngi u President ka FKJGP Sengkmie u Bah Dundee Cliff Khongsit u la long kum u kongsan, katba u Bah Arkinfield Khong-lam, Sports Secretary FKJGP Sengkmie kum u symbud kongsan ha ka jingdon ryngkat lang u Bah Khrawkupar Nong-siej, President ka FKJGP Mawlai Circle, ki nong-hikai bad kiwei kiwei.
