Brazil, Nailar:
Ha kawei ka jingjia la ong ba kawei ba ka khynnah skul ka la duh noh ia ka jingim tang namar ka jingbakla katba ka dang kaweh kti ia ki paralok bad sei ia ka khlieh shabar ka bos ha kaba ka la tyngkhuh pat ia uwei u ‘post’ uba don ha ka lynti ba katei ka bos ka iaid ha katei ka por.
Kane ka la jia hapoh Nova Friburgo, hajan Rio de Janeiro ha ka 16 tarik u Nailar. Katei ka khynnah skul kadei kaba la tip kyrteng kum ka Fernanda Pacheco Ferraz, 13 snem ka rta kaba dang thmu ban leit phai noh sha iing na Professor Carlos Cortes State College.
Ki nongsakhi kiba iohi ha katei ka por, ki iathuh ba katei ka khynnah ka la sei ia ka khlieh jongka napoh ka jingkhang iit jong ka bos sha ka liang ka diang jong ka bos, khnang ba kan ioh ban rah kti bad khublei ia ki paralok kiba la hiar na katei ka bos. Hynrei, ha mar katei ka por, da ka jing sniewbok, u nongñiah jong ka bos um kwah ban pynslem namar kan sa wanrah ia ka jingdheng kali ha katei ka surok, kumta u la iaid noh bad ha mar katei ka por, ka khlieh jong katei ka khynnah ka la tyngkhuh ia uwei u nar ‘post’ uba don ha katei ka surok bad tang kumta hi, ki briew kiba don ha katei ka bos ki la phah ia utei u nongñiah ba un sangeh bad ban peit shwa ia katei ka khynnah kaba la tyngkhuh ia utei u nar post bad ki la pyntip noh mar-mar sha ki bor ba dei khmih bad sha ki tnat iarap ban ioh pyllait im ia katei ka khynnah lada dang don ka lad.
Hynrei kaba sngewsih ka long ba katei ka khynnah ka la khlad noh hashwa ba ki briew jong ka kynhun iarap kin leit poi sha katei ka jaka ba katei ka jingjia ka la jia.
Na ka liang ki bor pyniaid jong ki bos paidbah, ki la phah ia ka khubor sngewlem sha ka iing jong katei ka khynnah rit bad ki kular ruh ban pynïoh ia ka hok jong katei ka khynnah da kaba tohkit bad wad bniah bha halor katei ka jingjia bad ban lap ruh ioh lehse ka dei ka jingbakla jong utei u nongñiah ruh uba ñiah ia katei ka bos.
Ia ka met jong katei ka khynnah, la leh burom khatduh bad pyndep noh ruh ha ka sngi kaba bud hi (17 Nailar, 2023) ha ka por kumba 4:30 noh phai sngi ha u Lum Jingtep Trilha do Ceu.
