Shillong, Nailar 23
Ka skul Saiden Secondary School ha ka sngi Balang ka la kitbok kitrwiang ïa ka kynhun ïalehkai U-17 ki kynthei jong ka skul ka ban mihkhmat ïa ka Meghalaya sha ka lympung National Level Subroto Cup, 2023 ka ban long ha New Delhi.
Ïa kane ka jingkitbok kitrwiang la ai ha ka jingïalang kaba lyngkot ba la pynlong hapoh ka skul, ha shwa ba ki ‘thei ïalehkai kane ka skul, kin sa leit ban pyntbit shen ïalade ha nongbah Shillong na ka bynta ban pynkhreh pura ïalade na ka bynta katei ka lympung ïalehkai phutbol ba heh duh ki skul hapoh ka Ri.
Ha kane ka jingïalang la ïa donlang u Bah S Pakyntein, Sub Inspector ka Ri Bhoi District Police, u Bah EK Lapang, Rangbah Shnong ka Saiden bad ruh u Chairman ka Managing Committee jong ka Saiden Secondary school, u Bah Sumarlang Swer, Coach, ki nonghikai bad kiwei kiwei.
Haba kren ha kane ka sngi, u Bah S Pakyntein u la pynpaw ïa ka jingkmen ban ïa donlang bad kane ka kynhun ïalehkai jong ki kynthei napoh ka Saiden Secondary School lem bad ki bor pynïaid skul, ha kaba yn lah ban ai ïa ki jingkitbok kitrwiang ïa ka kynhun hashwa ba kan mih na ka shnong Saiden ban leit pyntbit shuh shuh hashwa ban leit shimbynta pat sha nongbah Delhi.
Kum uwei na ki nongai mynsiem, u Bah Pakyntein u la kyntu ïa ki ‘thei ïalehkai baroh, ba kin long kiba minot bad kohnguh ïa ki nonghikai pyntbit kiban ai ïa ki buit ïalehkai bapher bapher ha nongbah Shillong, khnang ba kum ka kynhun kan lah ban shah pyntbit bha hashwa ban aireng bad ki kynhun na kiwei kiwei ki jylla ha ka National Level Subroto Cup.
La ïoh ruh ïa ki kyntien kyntu kynpham bad ka jingkitbok na u Bah EK Lapang uba la ai mynsiem ïa ki ‘thei ïalehkai da kaba kyntu ruh ba kim dei pat ban shah ïalam bakla ha kino kino ki jingsniew haba ki mih na la ïing ban leit sha nongbah Shillong ne wat ha nongbah New Delhi, ha kaba kum uwei na ki nonghikai ka skul Saiden, u Bah Lapang, u la kular ruh ban pynïoh ïa ki jingdonkam jong kane ka kynhun jong ka Saiden SS.
