Los Angeles, Nailar:
Katkum ki khubor la ong ba ki dang don sa kumba 1,100 ngut eiei kiba dang jah rngai na ka jingpluh khlaw ha ka dew lynnong Maui jong ka Hawaii. Kumta na ka liang ka tnat FBI ka dang leit wad ia ki bahaiing jong kitei ki briew khnang ban ioh ban pynithuh ia kito kiba la ioh sei bad ioh lum na ki metiap kiba don ha katei ka jaka.
Katei ka jingpluh ha Hawaii ka long kaba la shyrkhei haduh katta bad ka bym ju jia hapoh United States da ki phew snem mynta. Ha katei ka jingpluh khlaw, kumba 115 ngut ki paidbah nongshong shnong ki la duh ei la ka jingim bad ka jingdon jong kiba khlad ka dang lah ban kiew shuh shuh ynda la ioh ban shim jingkheiñ bha thik- pa thik katkum ka jingdon jong ki briew kiba shong ha katei ka nongbah.
Shuh shuh ruh la ong ba wat ka shnong Lahaina, kaba long ka shnong ia 12,000 ngut ki riew paidbah, katei ka shnong ruh ka la shah pyn-um lut ha katei ka ding bad da ki hajar tam ruh kiba la shu jah rngai bad khlem iohi syrngiew shuh naduh ba jia katei ka jingpluh khlaw tad haduh kane ka kynti, ha kaba ki tnat ba dei khmih bad ki tnat iarap ki dang ialeh ban leit wad ia kitei kiba jah bad bun na ki, ki dei kiba la khlad noh bad la ioh lum sa tang ia ki metiap jongki, kiba la ingkhong ha katei ka jaka.
Ka Federal Bureau of Investigation (FBI) haduh mynta ka dang ialeh ban wad bniah ia ka jingkheiñ bad jingdon jong ki paid nongshong shnong ha kitei ki thaiñ bad ban sngewthuh ia ka jingdon kiba jah bad kiba khlad haduh kane ka por.
Tad haduh jong ka Sngi Ba-ar, ka FBI ka la ai jingkheiñ antad ba ki don kumba 1,100 ngut eiei ki paidbah nongshong shnong na katei ka nongbah kiba dang jah rngai bad kiba ym pat shym la ioh jingtip eiei halor ka jingdon jong ki. Hynrei la ong ba wat ka jingdon jong kiba jah ruh ka dang lah ban kiew shuh shuh ynda la ioh ia ka jingkheiñ kiba don baroh bad kito kiba la lait-im na katei ka jingjia.
Haba iadei bad kane, ka FBI ka la pynbna ia u nombar telephone ba ki bahaiing jong kitei kiba jah, kin ioh ban pyntip sha katei ka tnat khnang ba yn lah ban shim jingkheiñ thik-pa-thik bad ban ioh ruh ban wad ia kitei kiba jah baroh.
Kumjuh ruh u heh ka tnat pulit na Maui, u John Pelletier haba iakren bad ki lad pathai khubor, u la ong ba ki bor pyniaid ha kane ka por ki dang pynkhreh ia ki jingkheiñ lyngba ka kaiphod ba la shim jingkheiñ ia ka jingdon ki paid nongshong shnong baroh hapoh jong katei ka nongbah.
Ha kajuh ka por ruh ka FBI ka la phah ia ki briew jongka, ban leit shim ia ki DNA jong kito ki bahaiing hasem jong kitei kiba jah rngai bad ki bym shym lah ban poi sha Maui, khnang ban lah ban pynithuh ia kitei ki metiap kiba la ioh lum baroh.
Namar la ong ruh ba ka long kaba eh haduh katta ban pynithuh ia kitei kiba jah bad kiba la ioh tam na ki dpei ba la shah pyn-um ha katei ka ding hapoh Lahaina.
Haduh mynta, ki briew jong katei ka tnat ki dang lah ban pynithuh tang kumba 27 napdeng ki 115 tylli ki metiap ba la ioh tam na katei ka shnong baroh.
