Shillong, Nailar 23
Ki club ba paw ha ka lympung ïalehkai phutbol ha Saudi Arabia ki la pynkhih shisha ïa ka ïew ïadie ïathied rangïalehkai ha kine ki katto katne bnai, ha kaba ki la lah ban wanrah ïa ki rangïalehkai kiba paw ha ka pyrthei bad kiba la don bynta ruh ban jop ïa ka Champions League.
Kane kan don bynta ruh shibun ha kaba ïadei bad ka jingïalehkai phutbol ha India, naba ka don ka lad ka kabu ha kaba kawei na ki club na Saudi Arabia ka lah ban ïakynduh pyrshah ïa ka Mumbai City Football Club ha ka ‘group stage’ jong ka lympung AFC Champions League 2023-2024.
Ki Club kiba paw na ka Ri Saudi Arabia ki ban sa ïakhun ha ka lympung AFC Champions League bad kiba kynthup ïa ki rangïalehkai kiba paw jong ka pyrthei ki long ka Al-Nassr FC ban mihkhmat da u Cristiano Ronaldo bad u Sadio Mane, ka Al-Hilal SFC ban mihkhmat da u Neymar, ka Al-Ittihad Club ban mihkhmat da u Karim Benzema bad u N’Golo Kante.
Ka Mumbai City FC, kaba la ïoh rah ïa ka nam lahduh jong ka lympung Indian Super League ha ka aiom ba la lah, ka dei tang maka, ka club na India ka ban ïashim bynta ha ka lympung 2023-24 AFC Champions League, hadien ka jingjop pyrshah ïa ka Jamshedpur Football Club ha ka jingïakhun ha ka ‘playoff round’.
Shuh shuh, kane kan dei ruh ka snem kaba khatduh ba ki Club ka India kin ïashim bynta ha kane ka lympung kaba heh jong ka dewbah Asia, naba hadien kane, ki club na India kin nym lah shuh ban shim bynta ha ka aiom ban wan jong ka AFC Champions League, kumta kane ka kynti kaba mynta ka la wanrah shisha ïa ka jingkmen bad jingkhmih lynti hapdeng ki riew ieit phutbol, ba ki lah ban ïohi bad sakhi ïa ki khlur ïalehkai phutbol ban wan sha India.
Kumba ka long mynta, ka Mumbai City ka la don ha ka Western Region jong ka jingleh ‘draw’. Haba phai sha ka pot, kaba ju leh ha ki draw, ka Mumbai City ka don ha ka Pot 3, katba ka Al-Hilal SFC bad ka Al-Ittihad Club ki don ha ka Pot 1, ka Al-Fayha FC ha ka Pot 2, bad ka Al-Nassr FC ha ka Pot 4.
Kane ka draw ne ka jingpynhap bad phiah ïa ki club ha ki group bapher bapher, kan sa long ha ka 24 tarik mynta u bnai bad hadien kane, yn sa lah ban tip ba mano napdeng kine ki khlur ïalehkai phutbol ka pyrthei ki ban sa wan ïuh kjat ha India.
