Jowai, Nailar 23
Ka Lumpariat Sports Club ka la khur ïa ka jingjop ha ka lumpung ïalehkai 2nd Division Football Tournament-6th Debo Shullai Memorial Trophy ïa kaba la pynïaid da ka West Jaintia District Sports Association (WJDSA).
Kane ka la wan hadien ba ka Lumpariat SC ka la lah ban pynliem noh ïa ka West Madan Mustem Sports Club da 2-0 kol ha ka jingïakhun kaba la long ha madan Kiang Nangbah Stadium, Jowai ha ka sngi Balang.
Haba phai sha kane ka jingïakhun, ka Lumpariat SC ka la ïoh ban thep kol ha ka minit kaba 70 lyngba u Mario Syndai bad u Lovingstar Papiah u la bakla thep sha la ka jong ka kol (own goal) ha ka minit kaba 74.
Katba ïa ka jingïakhun kaba bud kaba la thmu ban pynlong hapdeng ka Dongmihsngi Sports Club pyrshah ïa ka Chutwakhu Sports Club la hap ban pynsangeh noh na ka daw jong ka jingpynthut jong ka bor mariang.
Ka jingïakhun ha ka 25 tarik mynta u bnai kan long hapdeng ka Chilliangraij Sports Club pyrshah ïa ka NSA Sports Club ha ka por 12.00 baje mynsngi, katba ka Muknor Thadmuthlong Sports Club kan ïakhun pyrshah ïa ka Lion Sports Club ha ka por 2.00 baje nohphai sngi.
