Agartala, Nailar:
Shi sngi hadien ba ki pulit jong ka Tripura ki la ïoh ban kurup ïa u Brown Sugar uba la kot sha ka T.10 klur, ki pulit ha ka 22 tarik, Nailar ki la kem sa ïa ki shi kurim bad kurup ruh ïa u Ganja uba la kot sha ka T. 4.50 lak na Churaibari kaba don ha khappud Assam-Tripura. Haba ïakren halor kane ka mat, u Superintendent of Police jong ka North Tripura District u Bhanupada Chakraborty u la ong ba ki pulit ki la bat ïa kawei ka kali Suzuki BALENO hakhmat ka jaka treikam jong ki pulit ka Churaibari kaba la ïaid lynti sha Assam na Tripura.
“Haba ngi la bat ïa kane ka kali ha ryngkat u Officer-In charge of Churaibari Police Station u Samaresh Das bad u Sub-division Police Officer, u Debasish Saha, ngi la kurup noh ïa u Ganja ba 30 kilo ïa uba la song ha ki 61 tylli ki song bad ba la buhrieh ha ki bynta jong ka kali”, la ong u SP. U SP u la ong ba la buh ïa kumba 16 tylli ki Naka Point ha kylleng ki jaka jong ka jylla naduh ka 19 tarik, Nailar kumba la bthah da u Myntri Rangbah u Dr Manik Saha.
“Haba ngi la ïohbat ïa kane ka kali ngi la lap ïa ki song jong u Ganja ba la buhrieh ha kiba bun ki bynta jong ka kali. Ngi la kem noh ruh ïa arngut ki briew. Kine ki dei ki shi kurim. Ïa ki briew kiba la shahkem la tip kyrteng kum u Sudip Karmakar (41) bad ka Dimani Debbarma (23), kine baroh arngut ki dei ki nongshong shnong jong ka Sidhai Mohanpur kaba hap hapoh ka West Tripura District. Ka dor lada die ïa une u Ganja kan long da kumba T. 4. 50 lak”, u la bynrap.
