Guwahati, Nailar:
U Myntri Rangbah jong ka Assam u Himanta Biswa Sarma u la pynshisha da kaba ong ba ym don ki samla jong ka jylla kiba ïoh ïa ka kam sorkar da ka jingïapeiñ pisa, la ong ka kaiphot kaba la pynmih ha ka 22 tarik, Nailar.
Kane ka jingkren jong u Myntri Rangbah ka la long ha ka por ba u la ai jubab halor ka jingkylli ba la buh halor ka jingjia jong ka jingïap jong ka Secretary ka BJP Kisan Morcha ka Indrani Tahbildar.
Kumba la ïathuh da u Myntri Rangbah, la ong ba kine baroh ki la paw pyrthei hadien ba la kynnoh ba ka la don ka jingdawa pisa ha kaba ïadei bad ka jingthmu ban pynïoh kam sorkar bad halor ka jingbym pynphai ïa ka pisa hadien ba ym shym la ïoh ïa ka kam.
U Himanta Biswa Sarma u la ong, “Wat lada ka jingïap jong ka Indrani Tahbildar ka long kaba sngewsih, kane ka jingjia ka la paw pyrthei ba ka long ha ka rukom ka bym don jingktah. Kumba la ïathuh, la ong ba kane ka jingjia ka la paw ba ka la don ka jingshim pisa na ki samla khlem kam khlem jam ha ka kyrteng ban ai kam bad lada jia ba kim lah ban pynïoh kam, yn sa pynphai noh ïa ka pisa ïa kaba ki la shim. Kane ka pynpaw shai ba ym don uwei ruh u samla ne ka samla ki ban ïoh ïa ka kam sorkar da kaba siew pisa.”
“Ki pulit ki la pynlong ïa ka jingtohkit halor ki daw kiba la pynlong ïa ka jingïap jong ka Tahbildar. Baroh kito kiba la siew pisa na ka bynta ban ïohkam ki la shah tohkit ha ki pulit. Kine ki la phla ba ki la siew pisa hynrei kim shym ïoh ïa ka kam kumba la ïakut”, la ong shuh shuh u Myntri Rangbah.
