Mexico City, Nailar:
Ki bor pyniaid ka Mexico ha ka Sngi Balang ki la pyntip ba 16 ngut ki phetwir na Mexico bad uwei na Venezuelan ki la khlad noh hapdeng ka jing iatyngkhuh kali ha ka phang pdeng jong ka Mexico ha ka Sngi Ba-ar.
La ong ba napdeng jong 52 ngut ki pasenjar kiba shong ha katei ka bos ba don kitei ki phetwir, 10 ngut ki dei na Venezuela bad kitei ki phetwir ki dang dep pynbiang ia ki kot- ki sla ban leit rung sha United States da ka rukom kaba dei, ym kumba ju leit rung be-aiñ da kiba bun ki phetwir.
Kumba 36 ngut ki pasenjar kiba shong ha katei ka bos ki la mynsaw bad la pynkit ia ki sha ki hospital bapher kiba don ha katei ka nongbah.
Kane ka la jia hadien ba katei ka bos ka la iatyngkhuh bad kawei pat ka trok ha katei ka phang pdeng jong ka Mexico bad kumta ki bor pyniaid ka Mexico ki la pyntip ba ia ka met jong kitei kiba khlad yn sa iarap ban pynpoi noh sha Venezuela, kaba long ka jaka ba ki shong- ki sah.
