California, Nailar:
Ki bor pyniaid ka Orange County ki iathuh ba 4 ngut ki briew kythup ia u nongsiat, ki la khlad noh hapdeng ka jingiasiat ha ka jaka leh kmen hapoh Orange County jong ka nongbah California.
La ong ba 6 ngut kiwei pat ki la mynsaw jur hadien ba utei u nongsiat ha katei ka jingjia u la synreit kuli naphang ha ka jaka leh kmen ‘Cook’s Corner’ kaba don ha Trabuco Canyon jong ka Orange County.
Hynrei, ki pulit kim pat shym la ai jingpynshai halor kumno utei u briew u leit poi sha katei ka jaka bad kaei ka daw kaba pynlong ia u ban synreit kuli naphang ha katei ka jingjia.
Haba iadei bad kane, ki pulit ki dang bud dien bad wad bniah halor kane ka jingjia, da kaba wad ia kito kiba don ha katei ka jaka kum ki nongsakhi bad ban ioh tohkit ruh ia ki halor ka sdang- ka kut jong katei ka jingjia.
