Tura, Nailar 24
Ki rangïalehkai jong ka kur A’gitok bad ki ‘thei ïalehkai jong ka kur Mrong, ki long artylli ki kynhun kiba la ïoh ban rah mynta ka snem ïa ka nam lahduh jong kawei na ki lympung ïalehkai phutbol jong baroh ki kur ki jait jong ka rilum Garo, ïa kaba la tip kum ka 1st Women’s bad 3rd Men’s Inter Mahari 2023.
Ïa kane ka lympung ïalehkai la pynlong da ka jingïatreilang ka ophis u District Sports Officer, ka ophis jong DC bad ka District Football Association.
Ïa ka final jong kane ka lympung la pynlong ha ka 19 tarik mynta u bnai ha PA Sangma Stadium, Tura, ha kaba na ka liang ki shynrang ka kur A’gitok ka la rah ïa ka nam lahduh hadien ba ka la lah ba kan pynliem noh ïa ka kur Te’gitde, katba na ka liang ki kynthei ka kur Mrong ka la lah ba kan pynliem noh ïa ka kur Mangsang, ka kynhun ïalehkai jong ka kur Bolwari bad Cheran ki la ïoh ba kin rah ïa ka nam Best Discipline Team.
Ha kane ka kynti ha ka liang ki kynthei, ki kur ba la poi ban wan ïashim bynta ki long haduh 19 tylli bad na ka liang ki shynrang ki kur ba la ïashim bynta ki long 39 tylli.
Ïa kane ka lympung ïalehkai la plie da u Speaker ka ïingdorbar thawaiñ ka jylla u Thomas A Sangma ha ka jingïadon lang ki MDC ka GHADC.
Ha ka sngi kaba kut u kongsan dei u Myntri Rangbah ka jylla u Conrad K Sangma bad sakhi lang da kiMLA jong ka Mahendraganj, Selsela, Chokpot bad ki MDC ka GHADC.
Ki khusnam kiba la sam ha kaba kut ka final jong kane ka lympung ka long ba ka kynhun kaba rah ïa ka nam lahduh, ki la ïoh ban khur ïa ki takma (medal) ka trophy, u Sniang, 50 kilo u khaw, u slasha, shini, musla, mluh, piat, rynsun, sying, pathaw, umphniang bam, phan, shynrai ryngkat bad ka song pisa kaba long 30 hajar ïa ki shynrang bad 20 hajar na ka bynta ki kynthei.
Haba phai sha ki khusnam shimet, na ka liang ki kynthei ka nam Best player ka leit sha ka Nakatchi M Marak na ka kynhun ka Mrong Mahari, Best goalkeeper Nokame M Marak ka Mrong Mahari bad ka nam Highest Scorer ka leit sha ka Santila M Sangma na ka Mangsang Mahari.
Na ka liang ki shynrang pat ka nam Best Player ka leit sha u Bardy A Sangma ka A’gitok Mahari, Best goalkeeper Jayang T Sangma ka Te’gitde Mahari bad Highest Scorer sha u Chekam Tangrik B Marak ka Bolwari Mahari. Ka khusnam ïa kne baroh ka long ka trophy bad uwei u syiar ryngkuh.
