Shillong, Nailar 24
Haduh 17 ngut ki khynnah kynthei bad shynrang jong ka Meghalaya Swimming Association (MSA) ki la mih na ka jylla ban leit ban ïashim bynta ha ka ïakop jngi ba la tip kum ka 3rd Himalayan Swimming Meet 2023 ka ban long ha ka 26 tarik mynta u bnai ha Sikkim.
Ïa kane ka lympung ïakop jngi la pynlong da ka Sikkim Ametuer Swimming Association bad kumta ka Meghalaya kan dei tang maka, ka jylla na kane ka thaiñ ka ban shah khot sngewbha ban ïashim bynta ha katei ka jingïakop.
Kine ki khynnah kiba la mih na ka jylla ha ka miet jong ka sngi Palei kin ïakhun ha ki lai tylli ki kyrdan kata ha ka Junior, Sub-Junior bad kyrdan Senior.
Ha shwa ba kin mih na Jylla, ka la don ka jingïakynduh kaba lyngkot ba la pynlong ha ka sngi Palei ha Crinoline Swimming Pool, ha kaba ki nongïalam ka MSA nalor ka jingkitbok kitrwiang ïa kine ki khynnah, ki la ai ruh ki jingtip bad jinghikai kumno ban leh ha kane ka jingïakop bad ruh ban kyntu kynpham ba kin ri ka burom ka kor.
Haba ïakren bad ki katto katne ki khynnah ki ban ïashim bynta ha kane ka jingïakop ki la pynpaw ïa ka jingsngew kmen ban shah jied ban mihkhmat ïa ka jylla. Ki la ong ba watla kim shym la ïoh bun ka por ban pynkhreh bha ïa lade hynrei ki khmih lynti ba kin lah ban leh bha bad wanrah nam ïa ka jylla.
Katba na ka liang u President ka MSA u Bah Joe Marwein u la ong, “Ngi la jied ïa kine ki khynnah kiba long kynsai tam hapoh ka jylla bad kyrmen skhem ba kin wan shakhmat bad wanrah burom ïa ka jylla.”
U Bah Joe u la pyntip ba ïa ka jinglut jingsep baroh na ka bynta ka leit ka wan bad baroh ki jingdonkam, la bei pura beit na ka pla jong ka MSA.
“Hooid watla ka kam jngi ka la kiew bha hapoh ka jylla, hynrei ka long pat kaba eh ïa ki khynnah jong ngi ban wan shakhmat namar ngim don ïa ki standard swimming pool kiba dei ban don 50 meter, hynrei ngi don tang kaba 25 meter, kaba ngi ju ïa jngi naba ha ki jingïakop ka dei beit 50 meter,” u la ong.
