Imphal, Nailar:
Wat hapdeng ka por ba don ki kynrum-kynram bad ka jingïaumsnam ha ka jylla Manipur kaba la ïaid mynta lai bnai kynthih, pynban kaba ïadei bad kawei pat ka bynta kaba la ai mynsiem, ka jylla ka la pdiang ïa ka khubor kaba wan rah ka burom halor ka jingdon ïa u stad saïan jong ka jylla u Dr Ningthoujam Raghu Singh uba la long uwei na ki dkhot jong ka kynhun uba la don bynta ban ïatreilang hapoh ka ISRO kaba la lah ban pynpoi ïa ka Chandrayaan-3 sha u bnai.
U Dr Raghu Ningthoujam, uba dei u khun jong u N. Chaoba Singh bad ka N Yaimabi Devi na Thanga, kaba don ha Bishnupur distrik u la wan na ka longïing kaba im ha ka kam tong dohkha jong ka Thanga Khwairakpam Leikai, kaba don ha ki jaka lum ba la tawiar da ka pung Loktak Lake.
Une u la long u khynnah pule barim jong ka IISc Bangalore. U la pyndep ïa ka kyrdan Master ha ka Physics (Gold Medalist) na IIT-Guwahati, bad ïa ka Graduate ha ka Physics na DM College of Science Imphal bad hadien kane u la leit ban pynïasoh bad ka ISRO kum u Scientist C ha u snem 2006.
Ha ka jingphah khubor lyngba ka Twitter u Myntri Rangbah jong ka Manipur u Biren Singh u la ong, “Ka long kaei kaei kaba sngewkmen ban tip ba u stad saïan na Manipur, u Dr. Raghu Ningthoujam, na Thanga, Bishnupur u la long shi bynta jong ka Mission halor ka jingleit kiew bnai jong ka Chandrayaan.
