Shillong, Nailar 25
Ka jinglah ka Tiyana, Sakshi Suryavanshi bad Kirandeep Kaur ban khur ïa ka takma ksiar ha ka jingïakop Women’s 50M Pistol kaba la long ha Baku (Azerbaijan) ha ka sngi Thohdieng ka la pynlong ïa ka India ban pynkut ïa ka lympung ISSF World Champion-ships 2023, da kaba khur hynriew tylli ki takma ksiar bad phra tylli ki takma rnong.
Kumta ka India ka la pynkut ïa kane ka lympung da kaba khur 14 tylli ki takma, bad wan ba-ar hadien jong ka China. Na kane ka lympung, ka India ka la ïoh ban pynthikna ruh haduh saw tylli ki jaka ha ka lympung Paris Olympic.
Haba phai sha ka team event, kitei ki lai ngut ki ‘thei ïalehkai ka India ki la khur haduh 1573 point ban khur ka takma ksiar katba ka China ka la pyndep ha ka kyrdan kaba ar da kaba khur 1567, bad ka Mongolia ha ka kyrdan kaba lai da kaba ïoh 1566. Kham hadien jong kane, ka Tiyana ka la khur ruh ïa ka takma rnong ha ka jingïakop ‘individual Women’s 50M Pistol event’.
Ka Tiyana ka la khur haduh 533 point ha ka jingïakop para marwei. Ka Sakshi ka la khur 531 bad wan ha ka kyrdan kaba san, ka Kirandeep ka la poi ha ka kyrdan kaba 11 hadien ba ka la khur 509 point.
Ka India ka la khur ruh ar tylli ki takma rnong na ka Men’s 50M Pistol. U Ravinder Singh hadien ba u la kamai 556 point ha ka jingïakop para marwei u la khur takma rnong bad kawei pat ka la wan na ka double ba la ïakhun da u Kamaljeet bad Vikram Shinde.
