Shillong, Nailar 25
Kum shibynta jong ka jinglehkmen ïa ka National Sports Day, ka Thadlaskein Sports Association (TSA) kala pyntip ban kan pynlong ïa ka jingïalehkai Badminton kaba shi sngi kata ha ka 28 tarik mynta u bnai ha ïing hall jong ka dorbar shnong Khliehtyrshi.
Kane ka jingïakop kan long tang na ka bynta ki shynrang bad ka jingïalehkai kan long mar ar ngut (Men’s Double). Kiba lah ban ïashimbynta kin dei tang ki sports club kiba hap hapoh ka Thadlaskein Block.
Kino kino kiba kwah ban ïashimbynta, la kyntu ba kin pynpoi noh ïa ki kyrteng ha u general secretary ka TSA u Ma SS Langi bad General Secretary Khliehtyrshi SCSC Rimi Ryngkhlem ha ka 26 tarik Nailar ryngkat ka bai entry T.500. Ka khusnam ba la pynkhreh na ka bynta ki lahduh ka long T.5000 bad kiba wan ba- ar T.2000.
